Алматыдағы мораторий: Қай жерлерде құрылыс жүргізуге тыйым салынды?

Алматы қаласының әкімдігі Президент Қасым-Жомарт Тоқаевтың тапсырмасынан кейін қаланың жоғарғы бөлігінде құрылысқа қандай шектеулер енгізілгенін түсіндірді, - деп хабарлайды Tengrinews.kz тілшісі.
Не болды?
3 тамыз күні Қасым-Жомарт Тоқаев Алматы әкімі Дархан Сатыбалдымен кездесіп, қаланың жоғарғы бөлігінде көпқабатты тұрғын үй кешендері мен нүктелік құрылысқа мораторий енгізуді тапсырды. Бірыңғай жоспарға сәйкес әлеуметтік инфрақұрылым мен туристік кластер нысандары ғана құрылысқа рұқсат етілген нысандар ретінде ерекшеленді.
Әкімдік не деп жауап берді?
Tengrinews.kz сауалына жауап ретінде Алматы қаласының қала құрылысы және урбанистика басқармасы "қаланың жоғарғы бөлігі" деген ұғымға түсініктеме берді.
Шектеу келесі шекаралардан оңтүстікте орналасқан аумақтарға қатысты:
Талғар тас жолы,Шығыс айналма автожолы,Әл-Фараби даңғылы,Саин және Жандосов көшелері.
Басқарма өкілдері қаланың жоғарғы бөлігіндегі қарқынды құрылыс бірқатар жүйелі мәселелерге әкеліп соғып отырғанын айтты. Оның бірі – әлеуметтік инфрақұрылымның жетіспеушілігі. Бұл аудандарда білім беру мен медицина мекемелері тапшы.

"Сонымен қатар, қаланың жоғарғы бөлігінде орталықтандырылған су және кәріз жүйелері жоқ, ал бар желілер бірнеше монополистің бақылауында, олар шамадан тыс жүктемеге ие әрі қажетті қуаттылықты қамтамасыз ете алмайды. Көше-жол желісі көлік ағынын көтере алмай жатыр, ал арық жүйесінің болмауы нөсер жауын кезінде су басуға алып келеді", – делінген жауапта.

Сондай-ақ, бұл аудандарда топырақтың құрамына да қауіп бар екені көрсетілген:
Тау бөктеріндегі көптеген аймақтар сазды, ылғалданғанда жылжуға бейім жерлерде орналасқан. Заңсыз құрылыс, жасыл желектерді кесу және рұқсатсыз септиктерді қолдану топырақтың сырғуына және бұзылуға себеп болады.
Бұған қоса, таулы аймақта бұрын облыс аумағынан қалаға берілген, ауыл шаруашылығы мақсатындағы игерілмеген 1 500 жер телімі (2 000 гектардан астам) орналасқан.

"Жер кодексіне сәйкес, қалалық аумақта ауыл шаруашылығы жерлерін орналастыруға тыйым салынады. Яғни, бұл жерлерге көпқабатты тұрғын үй салу инженерлік коммуникациялар мен әлеуметтік және көлік инфрақұрылымына қосымша жүктеме түсіреді", – деп түсіндірді мамандар.

Не өзгермейді?
Қала құрылысы және урбанистика басқармасының басшысы Алмас Жанбыршының айтуынша, мораторий қазіргі уақытта салынып жатқан нысандарға қатысты емес.

"Бүгінгі таңда қалада еңі 15 градустан асатын беткейлерде құрылысқа тыйым салынған, жоғарғы бөлікте биіктігі 3 қабаттан аспау керек, сондай-ақ беткейлерді кесуге болмайды. Алайда құрылыс компаниялары заңмен нақты реттелмеген таунхаус сияқты көппәтерлі үйлерді салып жатыр. Мораторий аясында мұндай тұрғын үй құрылысына жобалық құжаттар берілмейді. Бұл шектеу қазіргі салынып жатқан нысандарға әсер етпейді. Сонымен қатар, басқарма 2040 жылға дейінгі Бас жоспарға түзетулер енгізбек – бұл жасыл аймақтарды кеңейту мен тау бөктерін теңгерімді дамытуға бағытталады. Нақты нәтижелері туралы кейінірек хабарланады", – деді Жанбыршы.

Айта кетейік, Алматының элиталық тау бөктеріндегі аудандары жылдар бойы ауызсу тапшылығынан зардап шегіп келеді. Мұндай шағынаудандар қатарына Ерменсай, Аскартау және Ақтөбе кіреді. Осы ауданның бір коттедж қалашығында бір жылдан бері мүлде су жоқ.
Шілде айында №1 балалар үйінің Баганашыл тау бөктеріндегі ауданға көшірілуі қоғамдық резонанс тудырған болатын. Белсенділер бұл элиталық жер теліміне құрылыс салушылар көз тікті деп мәлімдеген.
Сілтемесіз жаңалық оқисыз ба? Онда Telegram желісінде парақшамызға тіркеліңіз!