Табиғат энергиясы: Жамбыл облысы экотуризм дамып келеді
XXI ғасырда туризм саласы да басқа салалар сияқты қарқынды өзгеруде. Соның ішінде болашағы зор бағыттардың бірі — экологиялық туризм. Бұл — табиғи аймақтарға зиян келтірмей, жергілікті қауымдастықтарды қолдау арқылы жүзеге асатын жауапты саяхат түрі. Жамбыл облысы осы бағытта ерекше әлеуетке ие. Өңірдің табиғаты көркем, климаты алуан түрлі, географиялық орналасуы да қолайлы.
Облыс шөлейттерден бастап Тянь-Шаньның альпілік шалғындарына дейінгі түрлі климаттық белдеулерде орналасқан. Үш жағынан таулармен қоршалған. Аймақта 250-ден астам өзен мен канал бар. Мұнда сегіз қорықша орналасқан, соның ішінде еліміздегі ең көне — Ақсу-Жабағылы мемлекеттік табиғи қорығы, ол ЮНЕСКО-ның Бүкіләлемдік мұралар тізіміне енген. Аумағы 128 мың гектарды құрайды. Қорықта қар барысы, арқар, аю сынды сирек жануарлар мекендейді, сондай-ақ эндемикалық өсімдіктер өседі, олардың ішінде ең атақтысы — Грейг қызғалдағы.
Жамбыл облысы мәдени-тарихи мұраға да бай: мұнда 3510 тарихи ескерткіш бар, олардың бесеуі ЮНЕСКО тізімінде, сегізі — «Қазақстанның киелі 100 орны» жобасына енген. Өңірде туризмнің барлық дерлік түрлері дамып келеді: тарихи-мәдени, зиярат, медициналық, этникалық, танымдық, экстремалды, экологиялық және т.б. Этномәдени бірлестіктер, театрлар, мұражайлар мен қолөнер орталықтары өңірдің рухани өміріне белсенді атсалысуда.
Туризм инфрақұрылымы да кеңейіп келеді: 224 қонақ үй, 395 қоғамдық тамақтану орны, 7 шипажай, демалыс аймақтары, балалар лагерлері жұмыс істейді. 2022–2024 жылдары туризм саласындағы кірістер екі есе өсті, туристер саны бір жарым есеге артты. 2025 жылдың алғашқы тоқсанында облысқа 44 мыңнан астам адам келген, оның ішінде 1000-ға жуық шетелдік турист бар.
Туризм облыс экономикасының маңызды драйвері ретінде қарастырылуда. 2024 жылы бұл салаға 22,9 млрд теңге инвестиция тартылып, жоспар 156%-ға орындалды. 18 млрд теңгеге 26 инвестициялық жоба жүзеге асуда, 350 жаңа жұмыс орны ашылмақ. Жаңа туристік нысандар — «Алмалы», «Koksai resort», «Зербулак» аквапаркі ашылды. Оларға апаратын жолдардың құрылысы басталды.
Тараз университетінде тау туризмінің гидтерін даярлау курстары өткізіліп, 36 маман сертификатталды. Жастар арасында белсенді спорт түрлерін насихаттау мақсатында «Мерке-2025» тау фестивалі ұйымдастырылды.
Алайда табиғатқа қызығушылықтың күрт артуы экожүйеге қауіп төндіруі мүмкін. Бұған мысал — Көлсай шатқалы. Мұнда жол салынып, туристік инфрақұрылым енгізілген соң, бірегей табиғи орта бұзылды. Мұндай жағдайлардың алдын алу үшін туризмді дамыту табиғатты қорғаумен қатар жүруі тиіс.
Сообщение Табиғат энергиясы: Жамбыл облысы экотуризм дамып келеді появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.