Аёлларни паспортга рўмолини ечиб тушишга мажбурлашни ҳам тўхтатиш керак – Алишер Қодиров
«Миллий тикланиш» партияси раҳбари Алишер Қодиров дунёвийлик ва эътиқод масаласида тенглик тарафдори эканлигини ёзмоқда. У, шу билан бирга, ҳар иккисида қонун талаблари устувор бўлиши кераклигини айтади.
«Ўзбекистоннинг дунёвий давлат эканлиги тортишилмайди. Дунёвий давлат кўпчилик сайлаган Парламент томонидан қабул қилиниб, кўпчилик сайлаган Президент томонидан мақулланган қонунларни бузмаган ҳолда, ўзи истаганидек яшаш имконини беради.
Ватанимизда барча миллат ва дунёқарашдаги ватандошлар эмин-эркин, қонунларни бузмаган ҳолда фаровонликка интилиши учун шароит яратиш устувор мақсад эканлиги мустаҳкам белгиланган. Ҳамма тенг ва ҳеч ким камситилмаслиги кафолатланган.
Агар бирон ватандош пиво ичмоқчи бўлса, ичади, бу унинг танлови, ичмайдиган ватандош ичмайди ва бунинг сабабини ҳар икки тоифа ҳеч кимга изоҳ беришга мажбур эмас.
Алкоголни ичиш мумкин, лекин реклама қилиш мумкинмас, бу амалдаги қонунда белгиланган, албатта, парламент сайловларини мутлақо ютадиган бирон сиёсий куч қонунни ўзгартириб алкоголни «миллий қадрият», бир жинслиларни оила қуриш талабини эса эркин танлов сифатида норма қилиши ҳам мумкин, бунга сиз ҳуқуқ берасиз…» – дейди депутат.
У ўзи раҳбарлигидаги «Миллий тикланиш» партиясининг тутуми ҳақида тўхталар экан, «партия ҳар қандай тараққиётни қадриятларга таяниши керак деган ғоясида мустаҳкам» эканлигини эслатади.
«Женифер Лопесни концерти сердаромад иш ва ёпиқ тадбир, наркотика тарқатиб, давлатга қарши тарғибот қилмаса, ўтказади, танасини кўрсатиш уни танлови, кўриш эса тадбирга билет олганларники, дунёвийлик шу!
Лекин, худди шундай ўраниб юрмоқчи бўлган аёл ватандошни ҳам танлови қонун билан ҳимоя қилинган. Ялонғоч намойишини дунёвийлик деб қабул қилдик, энди ёпиниб юриш ҳуқуқига ҳам даҳл қилмаслик кераклигини қабул қилайлик. Лопесга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак. Идентификация талаблари юзни очиқ бўлишини тақозо қилади, сочни эмас. Лопесга кўрсатган бағрикенглигимизни диндор аёлларимизга ҳам кўрсатайлик.
Дунёвийлик ишонганга ҳам, ишонмаганга ҳам тенг бўлаолиш дегани, зўрни заифга ҳаётдан дарс бериши эмас», – деб ёзади Алишер Қодиров.