Трамп-Путин саммити: Жаҳон ОАВда қизғин баҳс ва баҳолар
Аляскада бўлиб ўтган Доналд Трамп ва Владимир Путин учрашуви халқаро оммавий ахборот воситаларида катта муҳокамаларга сабаб бўлди. Журналистлар Америка президентининг қарсаклари, қизил йўлак, президент лимузинидаги биргаликда ҳаракат ва Оқ уй раҳбаридан кутилмаган сукутни қайд этишди. Шу билан бирга, Европа нашрлари Россия раҳбарининг бундай дабдаба билан кутиб олинишига танқидий муносабат билдирди.
The New York Times: Олқишлар ва инглиз тили
NYT ёзишича, Россия етакчисининг ташрифига максимал даражада расмий ва тантанали руҳ берилди: ҳарбий авиапарад, қизил йўлак, расмий қўл сиқиш ва президент лимузинидаги сафар. Трамп Путинни қарсаклар билан кутиб олди. Нашр шуни ҳам қайд этдики, Путин инглиз тилида бемалол мулоқот қилди ва унинг ёнида таржимон йўқ эди.
«Афтидан, таржимонлар ҳеч қаерда кўринмади, Путин эса инглиз тилида мулоқот қилиш учун етарлича эркин гапирди. Бу икки етакчи орасидаги суҳбатларга алоҳида махфийлик қўшиши мумкин».
CNN: Сукунатли Трамп ва Европа эътирози
CNN таъкидлашича, музокаралар бошида Трамп камдан-кам ҳолларда учрайдиган ҳолатда баёнотсиз сукут сақлади.
«Элмендорф-Ричардсон қўшма базасида икки етакчи сукут билан ўтириб, вазиятни кузатди. Ҳеч бири кириш сўзини айтмади».
Телеканал Европа етакчилари Путинга бундай тантанали муносабат кўрсатилишини оғир қабул қилганини қайд этди. Шу билан бирга, CNN уларнинг «тана тили»га эътибор қаратди ва саммит муҳитини совуқликдан йироқ деб баҳолади.
Reuters: Эски танишлардек илиқ муҳит
Агентлик учрашув муҳитини илиқ, гўё икки етакчи кўп йиллик дўстлардек тасвирлади.
«Трамп ва Путин бир-бирини қадрдон дўстлардек қарши олди. Иккаласи қўл сиқиб, самимий муносабат намоён этди».
NBC: Путиннинг танлови ва Зеленский билан фарқ
NBC ёзишича, учрашувдан сўнг Путин ўз Aurus автомобилига ўтириш ўрнига Трампнинг Cadillac лимузинини танлади.
«Учиш-қўниш йўлагида унинг шахсий автомобили турган бўлса-да, Россия етакчиси Трамп лимузинини афзал кўрди».
Телеканал, шунингдек, Трампнинг Путинга самимий муносабати билан Зеленскийга февралда кўрсатган кескин муносабати ўртасидаги катта фарқни таъкидлади.
Bloomberg: Хавфсизлик учун синов ва дипломатик услублар
Bloomberg учрашув тафсилотларини ёритиб, бу АҚШ махсус хизматлари учун катта синов бўлганини қайд этди.
«Трамп ўзининг қизил галстукида биринчи бўлиб пастга тушди. Путин қадамларини ишонч билан ташлаб, табассум билан қўл сиқди. Трамп эса қарсак билан қарши олди. Кейин Путин Америка президентининг зирҳли лимузинига ўтирди. Бу куч тузилмалари учун ҳақиқий имтиҳон бўлди».
Агентлик таъкидлаганидек, бу учрашув турли дипломатик услубларнинг тўқнашувини кўрсатди: Путин — стратегик сабр ва назорат тарафдори, Трамп эса тезкор ғалабалар ва шахсий манфаатларга урғу беради.
Sky News ва Bild: Санкциялар ўрнига қизил гилам
Sky News саммитни Путин учун «мукофот» сифатида талқин қилди.
«Қувғинди кўпроқ шерикка ўхшаяпти. Доналд Трамп санкциялар ўрнига Россия етакчисини давлат ташрифига тенг даражада қабул қилди».
Германиянинг Bild нашри эса Америка президентни Путинни олқишлагани ва унинг шарафига қизил гилам тўшалгани учун танқид қилди.
The Guardian: Ҳар икки томон учун фойда
Британия нашри ёзишича, саммит ҳар икки етакчи учун ҳам ютуқсиз якунланмади. Путин АҚШ президенти билан унинг ҳудудида учрашиш имконига эга бўлди, Трамп эса медиа-шоуда ўзини глобал сиёсатчи сифатида намоён этди.
«Учрашув ҳар иккиси учун ҳам ғалабага тенг бўлиши мумкин. Путин Америка заминида Трамп билан учрашди, Трамп эса жаҳон саҳнасида давлат арбоби сифатида намоён бўлди».
Хулоса
Аляска саммити натижаларига турли қарашлар билдирилди. Америка матбуоти муносабатларни самимий деб баҳоласа, Европа оммавий ахборот воситалари Путиннинг тантанали қабул қилинишига шубҳа билан қаради. Бироқ умумий хулоса аниқ: Трамп ва Путиннинг учрашуви дунё сиёсий саҳнасида катта баҳс ва қизиқиш уйғотди.