Ўзбекистонда этник қазоқлар сони аниқланди
Қозоғистон Парламенти Сенати раиси Маулен Ашимбаев Ўзбекистонда 800 мингдан ортиқ этник қозоқлар яшашини маълум қилди, деб Курсив хабар берди. Унинг таъкидлашича, қўшни мамлакатдаги қозоқ жамоасини қўллаб-қувватлаш ишлари изчил давом этмоқда.
Шу билан бирга, Ашимбаев Қозоғистонда 600 мингдан зиёд ўзбеклар истиқомат қилаётганини қайд этди. Улар учун ўзбек тилини ўрганиш, маданиятни ривожлантириш ва анъаналарни асрашга шароитлар яратилган.
Қозоғистонда ўзбек тилида фаолият юритувчи мактаблар, театрлар, адабий тўгараклар ва ОАВ мавжуд. Ўзбекистонда эса қозоқ диаспорасига ўхшаш кўмак кўрсатилади, республика қозоқ маданий маркази ишлаб турибди. Шунингдек, қозоқ тилини ўрганиш ва халқ анъаналарини асраш дастурлари амалга оширилмоқда.