Нигерияда масжидда бомдод намози вақтида 27 киши ўлдириб кетилди
Нигериянинг Кацина штатида 19-август куни кеча масжидга қуролли шахслар ҳужум қилди ва оқибатда камида 27 одам ҳаётдан кўз юмди. Бу ҳақида Ал Жазеера маълум қилди.
Маҳаллий аҳолининг маълум қилишича, ҳодиса Малумфаши туманидаги Унгуван Мантау қишлоғидаги масжидда бомдод намози вақтида содир бўлган. Қуролланган шахслар маҳаллий вақт билан тахминан соат 04:00 атрофида масжид ичида отиш бошлаган. Ҳозирча ҳеч қандай гуруҳ ёки шахс бу ҳужум учун масъулиятни ўз зиммасига олмаган.
Сўнгги йилларда Нигериянинг шимоли-ғарбий ва шимоли-марказий ҳудудларида шундай қуролли ҳужумлар мунтазам равишда содир бўлмоқда. Бу минтақаларда чорвадорлар ва деҳқонлар чекланган ер ва сув ресурслари учун кўпинча тўқнашувларга киришади, бу эса қуролли можароларни ривожлантиришига олиб келади.
Унгуван Мантау маҳалласини ҳимоя қилиш мақсадида армия ва полиция кучлари фавқулодда равишда ҳудудга жойлаштирилди. Қуролланган гуруҳлар кўпинча ёмғирли мавсумда экинзорлар орасида яшириниб, қишлоқлардаги масжид ва аҳоли пунктларига ногаҳон ҳужум қилишади.
Ҳужум натижасида яраланганлар ҳам бор, уларга тиббий ёрдам кўрсатилмоқда. Маҳаллий аҳоли бу воқеани ҳайрат ва шок билан қабул қилган ва келгусида шундай фожиаларнинг олдини олиш учун хавфсизлик чораларини кучайтиришни талаб қилмоқда.