د صوابۍ دالوړۍ کلي کې هم د اوبو تندر (چړک) ګڼ کسان وژلي دي
د صوابۍ د ګدون په دالوړۍ کلي کي خلک لا هم د ډبرو او خاورو خځلو لاندې د ایسار پاتې کسانو لټون کوي.
په دغه کلي کې د اګست پر ١٩مه خلکو مشال راډیو ته وویل، یوه ورځ وړاندې د اوبو تندر (چړک) پرېوتو له وجې ځیني کورونه تر ډبرو لاندې شول. د کلي خلکو مشال راډیو ته وویل، تراوسه د ۲۰ کسانو جسدونه یې وېستي دي خو د هغوی په وینا تر ۲۰ پورې نور کسان لا هم د خاورو خځلو او ډبرو لاندې ایسار پاتې دي.
له صوابۍ وړاندې په بونېر کې هم د اوبو تندر (چړک) پرېوتو لسګونو کسانو ته مرګ ژوبله اړولې وه.
دا په داسې حال کې ده چې په خیبر پښتونخوا کې د ناڅاپي شړکنده باران پر مهال پېښو او سېلابونو کې د وژلو شویو شمېر زیات شوی دی.
د خيبر پښتونخوا د قدرتي افتونو د نظم ادارې (پي ډي اېم اې) په وینا د اګست تر ۱۹مې د تلفاتو شمېر ۳۵۸ ته رسېدلی دی.
د مشال راډيو خبریال راپور لري.