Рабьонинг онаси: "Марсель" ўғлимга нисбатан адолатсиз йўл тутди

Франция чемпионатида 1-турдан кейин кутилмаган воқеа юз берди. “Марсель” жамоаси таркибидан француз ярим ҳимоячиси Адриен Рабьо ҳамда Жонатан Роу вақтинчалик равишда четлатилди. Бу қарор “Ренн” билан кечган учрашувдан кейин қабул қилинди. Маълумки, ўйин якунида Рабьо ва Роу ўртасида келиб чиққан тортишув жиддий оқибатларга олиб келди.

Ҳар икки футболчига жамоа раҳбарияти томонидан интизомий чора қўлланди. Улар фақат асосий таркибдан четлатилибгина қолмай, балки трансфер рўйхатига ҳам қўйилди. Бу ҳолат футбол жамоатчилигида катта муҳокамага сабаб бўлди.

Айниқса, Адриен Рабьонинг онаси Вероник Рабьо бу қарорга ўз муносабатини билдирди. Унинг таъкидлашича, ўғли учун бундай муносабат жуда оғир бўлган.

— Унинг четлатилгани ҳақида эшитганимда, бу мен учун катта зарба бўлди. Ростдан ҳам ўзимни ноқулай ҳис қилдим. Чунки ўғлим “Марсель” учун жуда кўп иш қилди. Бироқ клуб унга нисбатан шундай йўл тутди. Адриеннинг жаҳли чиқмаяпти, аммо у жуда хафа, — деди Вероник Рабьо “RTL” телеканалига берган интервьюсида.

Унинг сўзларига кўра, у илгари ПСЖдаги даврни Рабьо учун энг оғир пайт деб ўйлаган. Аммо бу сафар яна шунга ўхшаш вазият юз бериши хавотир уйғотмоқда.

— Агар ўғлим бутун мавсумни ўтказмай қолса, бу ҳақиқий фалокат бўлади. Биз бу каби ҳолатни аввал ҳам кўрганмиз ва унинг яна такрорланишини хохламаймиз, — деди футболчининг онаси.

Шу тариқа, “Марсель”да юз берган можаро ортидан Рабьонинг келажаги ноаниқ кўринишда қолмоқда. Мухлислар эса унинг трансфер бозорида қайси клубга йўналиши мумкинлигини қизиқиш билан кузатмоқдалар.