Гари Невилл чемпионлик учун асосий даъвогарни танлади

Англия Премьер-лигасининг янги мавсуми эндигина старт олган бўлса-да, футбол оламидаги мутахассислар, экспертлар ва таҳлилчилар чемпионлик атрофидаги баҳсларни қизғин муҳокама қилишга киришиб кетишди. Илк турдан кейиноқ кўплаб журналистлар ва футболда тажрибага эга одамлар қайси клублар соврин учун асосий даъвогар сифатида майдонга чиқиши мумкинлигини таҳлил қилишди.

Аксарият манбаларнинг фикрича, чемпионлик пойгаси асосан “Манчестер Сити”, “Ливерпул” ва “Арсенал” клублари ўртасида кечиши кутилмоқда. Чунки бу жамоаларнинг таркиби жуда кучли, футболчиларнинг индивидуал маҳорати юқори ва ўйин услуби жиҳатидан ҳам қолганларга нисбатан яхшироқ шакллангани яққол кўзга ташланмоқда.

Шу ўринда “Манчестер Юнайтед”нинг собиқ сардори ва ҳимоячиси, ҳозирги кунда машҳур телетаҳлилчи сифатида фаолият олиб бораётган Гари Невилл ҳам ўз фикрини билдиришдан четда қолмади. Унга берилган “Қайси жамоа янги мавсумда бош совринни қўлга киритиши мумкин?” деган саволга у қуйидагича жавоб берди:

— Мен “Арсенал”ни танлайман. Бу танловим шунчаки, қайсарлигимдан келиб чиққан қарор. Аммо очиғини айтсам, аслида чемпионликка асосий даъвогар ва ғолиб бўладиган клуб — бу “Манчестер Сити”, деб ҳисоблайман, — деди Гари Невилл.

Эслатиб ўтиш жоизки, “Манчестер Сити” Англия футболи тарихида илк бор кетма-кет тўрт мавсум чемпионликни қўлга киритган жамоа бўлган эди. Бироқ ўтган мавсумда улар ўз устунлигини сақлаб қололмади ва бош совринни “Ливерпул”га бой берди. Шунга қарамасдан, кўплаб мутахассислар Хосеп Гвардиоланинг ёзги трансферлар орқали жамоасини янада кучайтира олганини ва янги мавсумда яна рақобатбардош ҳолатга келтирганини таъкидламоқда.

Футбол таҳлилчилари ва экспертларининг катта қисми янги мавсумда чемпионлик масаласида асосий кураш шу уч клуб — “Ливерпул”, “Манчестер Сити” ва “Арсенал” ўртасида кечишини айтишмоқда. Мухлислар эса аллақачон ушбу мавсумдаги драматик тўқнашувларни сабрсизлик билан кутмоқда.