Акмал Рустамов: «Ҳақиқий голимиз яна ҳисобланмади»
Суперлиганинг 20-туридан ўрин олган «Қизилқум» – «Бунёдкор» (1:1) баҳсидан кейин мезбонлар бош мураббийи Акмал Рустамов матбуот анжуманида ўз фикрларини билдирди. Унинг айтишича, жамоа имкониятлардан унумли фойдаланганида йирик ҳисобда ғалаба қозониши мумкин эди. Шу билан бирга мураббий ҳакамлар фаолиятига ҳам эътироз билдирди.
«Вазиятлардан фойдаланолмадик»
— Ҳаммага салом. Ўйин оғир бўлишини олдиндан билгандик. «Хоразм»га қарши сунъий майдонда тўп тепиб келгандан сўнг табиий майдонга мослашиш осон кечмади. Шунга қарамасдан йигитларга миннатдорчилик билдираман, улар бор кучларини бериб ҳаракат қилишди. Агар яратилган имкониятларни голга айлантира олганимизда, 3-4 тўплик фарқ билан ғалаба қозонишимиз мумкин эди. Афсуски, вазиятлар самарасиз якунланди ва натижада бир очкодан бўлишиб олдик, — деди Акмал Рустамов.
«Танаффусда ишлашни тўхтатмаймиз»
Мураббийнинг таъкидлашича, Суперлигадаги қисқа танаффус жамоа учун фойда келтириши керак:
— Биз аллақачон режа тузганмиз. Футболчиларга уч-тўрт кун дам беришни, сўнг Навоий шаҳрида йиғин бошлашни кўзлаганмиз. Шунингдек, ўртоқлик учрашувларини ҳам келишиб қўйганмиз: Навоийда битта, Тошкентда эса икки назорат баҳси ўтказиш ниятимиз бор. Ҳеч қандай бўшашишга ҳаққимиз йўқ. Танаффусдан кейин кучлироқ ўйин кўрсатиб, жадвалнинг юқори қисмига чиқишни мақсад қилганмиз.
«Ҳақиқий голимиз бекор қилинди»
Рустамов ҳакамлик масаласига ҳам алоҳида тўхталди:
— Аслида бу ҳақда гапирмоқчи эмасдим, лекин тўхталишга мажбурман. «Сурхон»га қарши баҳсда икки пенальтимиз қўйилмади. Бугун эса тоза голимизни бекор қилишди. «Андижон» билан ўйинда ҳам шундай ҳолат бўлган эди. Ҳакамлар ишини назорат қиладиган юқори ташкилот бор, шуларни кўриб чиқишларини сўрайман. Бу ҳолатга қанча чидаш мумкинлигини билмайман.
«Ёшларга ишонч бериб борамиз»
Мураббий захирадан майдонга тушган Бобомурод Бозоров ҳақида ҳам фикр билдирди:
— У жамоамизнинг ўйинини кучайтирди. Кейинги баҳсларда ҳам навоийлик ёшларга имконият беришда давом этамиз.
Акмал Рустамов сўзини якунлар экан, мухлисларга миннатдорчилик билдирди ва жамоа олдиндаги баҳсларда янада кучлироқ натижа кўрсатишига ишончини таъкидлади.
Манба: championat.asia