Макронга танқид ёзган АҚШ элчиси Францияга чақирилди
Франция ва АҚШ ўртасида дипломатик майдонда янги тортишув юзага келди. Франция Ташқи ишлар вазирлиги Париждаги Америка Қўшма Штатлари элчиси Чарльз Кушнерни расман чақиртиришини маълум қилди. Бу қарор элчи томонидан ёзилган танқидий хат билан боғлиқ бўлиб, у Франция ҳукуматини мамлакатда кучайиб бораётган антисемитизм ҳолатларига қарши етарли чора кўрмаётганликда айблаган.
Франция Ташқи ишлар вазирлиги тарқатган баёнотда таъкидланишича, элчи Кушнер ўз мактубида мамлакат президенти Эммануэл Макронга мурожаат қилган ва Францияда антисемитизм илдиз отаётганидан жиддий хавотир билдирган. Шунингдек, у ҳукумат ҳаракатлари бу таҳдидни бартараф этишда заиф ва самарасиз эканини таъкидлаб ўтган.
Расмий Париж эса бу айбловларни кескин инкор этди. «Франция ушбу иддаоларни мутлақо асоссиз деб ҳисоблайди ва уларни қатъиян рад этади», — дейилади баёнотда. Шу билан бирга, Ташқи ишлар вазирлиги Кушнернинг чиқишини номақбул деб баҳолаб, унинг баёнотлари халқаро ҳуқуқ қоидаларига зид эканини эслатди.
«Ушбу сўзлар давлатларнинг ички ишларига аралашмаслик принципига мутлақо тўғри келмайди. Бу қоида 1961 йилда қабул қилинган Дипломатик муносабатлар тўғрисидаги Вена конвенциясида ҳам алоҳида белгилаб қўйилган», — дейилади расмий матнда.
Маълумотларга кўра, Чарльз Кушнер 25 август, душанба куни Франция Ташқи ишлар вазирлигига чақирилади ва унга расмий равишда эътироз билдирилади.