3 ай бұрын ұсталған “Астана LRT“ экс-басшысы Талғат Ардан әлі Түркияда

"Астана LRT" компаниясының экс-басшысы Талғат Ардан, биыл мамырда Түркияда ұсталғанымен, әлі күнге дейін Қазақстанға экстрадицияланған жоқ. Толығырақ мәліметті Бас прокуратура хабарлады, - деп хабарлайды Tengrinews.kz тілшісі.
Қазақстанның Бас прокуратурасы Талғат Арданды қылмыстық жауапкершілікке тарту үшін оны экстрадициялау туралы өтінішті Түркияның Әділет министрлігіне жолдаған.

"Бүгінде түрік тарапы бұл өтініш бойынша шешім қабылдаған жоқ, себебі Қазақстан Республикасы мен Түркия Республикасы арасындағы 1995 жылғы қылмыстық істер бойынша құқықтық көмек және тұлғаларды беру туралы келісімде мұндай өтініштерді қарау мерзімі нақты көрсетілмеген", – делінген Бас прокуратураның Tengrinews.kz редакциясының ресми сауалына берген жауабында.

Қарапайым тілмен айтқанда, келісімде мұндай өтініштерді қарау мерзімі жазылмаған. Яғни, Түркия бұл өтінішті бір жылдан кейін де, 10 жылдан кейін де қарауы мүмкін.

"Оның экстрадициясына қатысты өтінішті қарау Түркияның ұлттық заңнамасына сәйкес жүзеге асырылады", – деп қосты Бас прокуратура.

Егер Талғат Ардан Қазақстанға экстрадицияланса, оның Түркияда қамауда отырған уақыты Қазақстан соты тағайындаған жазаны өтеу мерзіміне қосылады.
Айта кетейік, бұған дейін ҰҚК Антальяда "Астана LRT" экс-басшысы Талғат Ардан ұсталғанын мәлімдеді.
LRT ісі бойынша тергеу бес жыл бұрын аяқталды. Осы уақыт ішінде басты айыпталушылар, яғни "Астана LRT" экс-басшысы Талғат Ардан мен Астана әкімінің бұрынғы орынбасары Қанат Сұлтанбеков халықаралық іздеуде болды.
Айта кетейік, Астана әкімінің бұрынғы орынбасары Қанат Сұлтанбеков 5,3 жыл іздеуде болды. Astana LRT бұрынғы басшысы Талғат Ардан 6 жылдан бері іздеуде болды.
Еске салайық, 2023 жылы мамырда Астананың қылмыстық істер жөніндегі мамандандырылған ауданаралық сотында LRT ісі бойынша айыпталушылар Талғат Ардан мен Қанат Сұлтанбековке сырттай үкім жарияланды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!