Тимур Кападзе иштирок этган матбуот анжуманида қандай фикрлар янгради?

CAFA турнири олдидан терма жамоамиз бош мураббийи Тимур Кападзе ва жамоамиз аъзоси Азизбек Турғунбоев матбуот анжуманида иштирок этди.

Тимур Кападзе: Мусобақа эртадан бошланади. Ҳамма тайёр. Ҳеч қандай жароҳатлар йўқ. Легионерлар келишмоқда. Менимча, бу турнир фойдали турнир, кўп ўйин бўлади. Бу кўплаб футболчиларни кўриб олишга ёрдам беради.

Азиз Турғунбоев: Жамоамиз яхши кайфиятда йиғилди. Ҳамманинг соғлиғи жойида. Машғулотлар яхши ўтмоқда. Ўйинга тайёргалик яхши бўлмоқда. Бу турнир биз учун фойдали бўлади деб ўйлайман.

- Паулу Бентунинг келиши ҳақида фикрингиз?

- Биз машғулотдамиз. Кўрдик, мураббий келганини. Келишув бўлгани ҳақида хабаримиз йўқ. Бу терма жамоа биз учун энг яхшиси бўлишини тилаймиз. Хайрли бўлсин. Бу жамоани ким бошқаришидан қатъий назар Ўзбекистон терма жамоасига мухлислик қиламиз. Мен ҳақимда илиқ фикрлар билдирганларга миннатдорлик билдираман. Барчага раҳмат айтаман.

Раҳбарият ҳам тажрибали ва ЖЧни кўрган мутахассисни олиб келиш ниятида. Ўйлайманки, бу балки яхшиликка. Биз ҳам доим ватанимиз термаси учун ёрдам берамиз.

Раҳбарият қандай қарор қабул қилса, биз буни қўллаб турамиз. Биз мураббийга эмас, терма жамоага мухлислик қиламиз. Биринчи марта ЖЧга чиқдик. Вақт оз қолди ва биз бу турнирга яхши ҳолатда боришимиз лозим. Ким бўлишидан қатъи назар биз терма жамоага фойдамиз тегса, хурсанд бўламиз.

Терма жамоа учун ҳаракат қилиш – шараф. Биз бу либос учун муносиб бўлишга ҳаракат қиламиз.

Худога шукрки, менга берилган вазифани бажардим. 34 йиллик орзуни амалга оширдик. Бундан барча хурсанд бўлди. Қолгани барчаси яхшиликка бўлади. Кўряпсизлар, сўнгги йилларда юртбошимиз томонидан футболни ривожлантириш учун барча ишлар амалга оширилмоқда. Келажагимиз бундан-да яхши бўлади.

Биз ўз устимизда ишлаймиз. Янада кучли бўлишга ҳаракат қиламиз. Ўша гап, терма жамоамиз яхши натижаларга эришишини тилаб қоламиз. Биз бундан фақатгина хурсанд бўламиз.

- Таркибда йўқотишлар кўп. Бир қатор футболчиларимизда жароҳатлар бор, бир нечтаси эса ҳали келмади. Бу бир томондан янги футболчиларни кўриб олиш учун яхши бўлса, иккинчи томондан натижага салбий таъсир кўрсатиши мумкин. Бу ҳақда фикрингиз?

- Терма жамоада доим қийинчилик бор. Чунки кимнидир жамоаси бугун ўйнайди, кимнидир жамоаси эса эртага ўйнайди. Биз 26 август куни йиғилдик. "Пахтакор" футболчилари эса эртасига ўйнади. Хоҳлаймизми-йўқми футболчи 2 кун ичида тикланиши лозим бўлади. Яъни улар энди бугун тўлиқ машғулотларда иштирок этади. Бундай вазиятда ҳар бир терма жамоа устозига қийинчилик туғдиради. Бироқ биз бунга кўникканмиз. Эртанги ўйинга оптимал ҳолатда тушишга ҳаракат қиламиз.

Машарипов ва Ашурматов катта йўқотиш. Уларга соғлиқ тилайман. Кейинги йиғинларда терма жамоага қўшилишади. Қолган легионерларда ҳали ҳам тур ўйинлари бўлмоқда. Биз тўлиқ таркибда 2 сентябрга келиб машғулот олиб борамиз.

Аммо бу бошқа футболчиларга имконият. Уларда 2 та учрашув бор. Кеча Ҳамробеков ва Юсупов келди. Нима бўлган тақдирда ҳам эртага яхши натижа кўрсатишга ҳаракат қиламиз.

- Карлуш Кейруш ҳақида нималар дея оласиз? Унинг бошчилигидаги Эронга қарши бир нечта учрашувда иштирок этгансиз. Ҳозирда эса Ўмон термасини бошқармоқда. Кейрушнинг Ўмонидан қандай қаршилик кутмоқдасиз?

- Ҳар доим ҳар бир жамоага янги мураббий келса, унга қарши ўйнаш қийинроқ бўлади. Унинг ўйин услуби ҳақида маълумотлар камайиб кетади. Ўмоннинг аввалги ўйинларини кўрдик. Аввалги мураббий бошқа услубда ҳаракат қилганди. Кейрушнинг жамоаси эса умуман бошқа тактикадан фойдаланмоқда. Тайёргарлик кўряпмиз. Ўйлайманки, яхши бўлади. Бундай турнирлар шунинг учун ҳам керак. Янги тактикалар, янги футболчиларни кўриб олиш учун яхши турнир. Кейруш анча таржибали мураббий. Лекин бу футбол. Биз ўз ўйинимизни кўрсатишга ҳаракат қиламиз. Барчасини ўйинда кўрамиз.

- Азиз Турғунбоевга савол. Эртага Ўзбекистон МТЖ янги стадионда ўйнайди. Мухлисларга қандайдир чорловлар борми?

- Албатта, бизни қўллаб-қувватлашга мухлисларни чорлаб қоламиз. CAFA турнири – футбол байрами. Биз яхши ўйин кўрсатиб, мухлисларни хурсанд қилишга ҳаракат қиламиз. Ҳаммани стадионга чорлаб қоламиз.

- CAFA'да ғалаба қозониб, терма жамоани топшириш сизга қанчалик таъсир қилади?

- Кетиш-кетмаслигимни ҳали вақт кўрсатади. Терма жамоа меники, мен бу ерда бўлишим керак деган гап бўлиши керак эмас. Терма жамоа доим мен учун барча жамоалардан устун бўлган. Бу – насиб нарса. Ҳар доим айтаман-ку, мен терма жамоа учун фақатгина яхшилик тилайман. Қандай ёрдам керак бўлса, доим тайёр тураман. Чемпион бўлишга ҳаракат қиламиз. Ҳар доим ҳар бир учрашувда максимал ҳаракат қиламиз. Ким бўлишидан қатъи назар ватан жамоасини муваффақиятга олиб боришини истайман.

Манба: championat.asia