Бүгін – Қазақстан Республикасының Конституциясы күні
30 тамыз – Қазақстан Республикасының Конституциясы күні. Биыл еліміз халқын бір тудың астына біріктірген Ата заңымыздың қабылданғанына 30 жыл толып отыр. Бұл күн тәуелсіз Қазақстан тарихында маңызды саяси-құқықтық белес болып, елдің демократиялық дамуы мен ұлттық бірлігінің белгісі ретінде есте сақталады. Конституция тек құқықтық құжат қана емес, сонымен қатар әлеуметтік келісім мен тұрақтылықтың, мемлекеттік билік пен азамат арасындағы өзара жауапкершіліктің кепілі.
Ең алғаш 1993 жылы қабылданған Конституциядан кейінгі қолданыстағы екінші Конституция 1995 жылғы 30 тамызда республикалық референдум арқылы бекітілді. Ол – мемлекеттің саяси-құқықтық іргетасы, ел дамуының негізгі қағидаттары мен азаматтардың құқықтары мен бостандықтарын нақты белгілейтін құжат. Конституцияның құрылымы – 9 бөлім, 98 баптан тұрады. Әр бабында мемлекеттік билік, азаматтық құқықтар, әлеуметтік және экономикалық қатынастар нақты бекітілген. Оның 1-бабында: «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және адамның өмірі, құқықтары мен бостандықтары» деп көрсетілген.
Сообщение Бүгін – Қазақстан Республикасының Конституциясы күні появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.