Аёллар раҳбарлигидаги бизнеслар триллионлаб соф фойда кўрмоқда
Ўзбекистонда аёллар раҳбарлигидаги корхоналарнинг иқтисодий жараёнлардаги иштироки тобора ортиб бормоқда. Миллий статистика қўмитаси эълон қилган сўнгги маълумотларга кўра, 2024 йил якунида мамлакатда аёл раҳбарлар бошқарувидаги 20 мингдан ортиқ кичик корхона ва микрофирмалар 4,2 триллион сўм соф фойда олган. Бу рақам аёллар тадбиркорлиги самарадорлигининг ортиб бораётганини яққол кўрсатмоқда.
Ҳисобот даврида битта корхона ҳиссасига тўғри келган ўртача соф фойда 202,6 миллион сўмни ташкил этган. Мазкур кўрсаткич аёллар раҳбарлигидаги бизнесларнинг бозорда ўз ўрнига эга эканидан далолат бериб, уларнинг фаолият юритишда рақобатбардош ва самарали эканини намоён этмоқда.
Мутахассислар таъкидлашича, бундай натижаларга эришишда давлат томонидан яратилган шароит ва имкониятлар муҳим аҳамиятга эга бўлган. Хусусан, тадбиркорликни қўллаб-қувватлаш дастурлари, айниқса аёллар учун ажратилган молиявий кредитлар, грантлар, солиқ имтиёзлари ва турли ташкилий ресурслар бизнес юритиш жараёнини енгиллаштирган.
Аёллар раҳбарлигидаги корхоналар мамлакат иқтисодиётининг турли соҳаларида фаолият олиб бормоқда. Улар хизмат кўрсатишдан тортиб ишлаб чиқариш, савдо, қишлоқ хўжалиги ва таълим каби кўплаб йўналишларда муваффақиятли лойиҳалар амалга оширмоқда. Бу эса аёлларнинг ижтимоий-иқтисодий жараёнлардаги ўрни тобора кучайиб бораётганидан дарак бермоқда.