Ўзбекистонлик дзюдочилар аралаш жамоавий дастурда иккинчи бўлди
София шаҳри (Болгария)да ўтказилган ўсмирлар ўртасидаги дзюдо бўйича жаҳон чемпионати ўз якунига етди. Бугунги кун дастурида аралаш жамоавий беллашувлар бўлиб ўтди ва энг кучли термалар аниқланди.
Саралаш босқичида ўзбекистонлик ёш дзюдочилар Франция, Қозоғистон ҳамда Мўғулистон жамоаларини мағлубиятга учратиб, финалга қадар етди. Ҳал қилувчи баҳсда улар дзюдо ватани саналган Японияга қарши тўқнаш келишди.
Кучли ва муросасиз ўйинда япон дзюдочилари 4:2 ҳисобида устунликка эришди. Натижада, миллий термамиз нуфузли мусобақани муносиб тарзда кумуш медаль билан якунлади. Бу натижа ҳам ўзбекистонлик ёш спортчиларнинг ортиқча ғайрати ва кучли тайёргарлигидан далолатдир.
Эслатиб ўтамиз, якка тартибдаги баҳсларда ҳам термамиз катта ютуққа эришганди. Ёш дзюдочиларимиз 5 та олтин ва 2 та бронза медали билан умумий ҳисобда биринчи ўринни қўлга киритган эди.
Шу тариқа, Ўзбекистон ўсмирлари Болгариядаги жаҳон чемпионатида тарихий натижалар қайд этиб, яна бир бор дзюдо йўналишида ўз сўзини айтди.