Тянцзинда Шанҳай ҳамкорлик ташкилоти тадбирлари бошланди
31 август куни Ўзбекистон президенти Шавкат Мирзиёев рафиқаси билан бирга Хитойнинг Тянцзин шаҳрида жойлашган "Мэйцзян" конгресс марказида ўтган Шанҳай ҳамкорлик ташкилоти саммитининг норасмий маросимларида иштирок этди.
Ушбу нуфузли йиғилишда ХХР раиси Си Жинпинг, Россия Федерацияси президенти Владимир Путин, Беларусь етакчиси Александр Лукашенко, Ҳиндистон бош вазири Нарендра Моди, Покистон бош вазири Шаҳбоз Шариф, Эрон президенти Масъуд Пизишкиён, Қозоғистон президенти Қосим-Жўмарт Тўқаев, Қирғизистон раҳбари Садир Жапаров, Тожикистон президенти Имомали Раҳмон, Туркия президенти Ражаб Тоййиб Эрдўған, Туркманистон президенти Сердар Бердимуҳамедов, Озарбойжон етакчиси Илҳом Алиев, Мўғулистон президенти Ухнаагийн Хурелсух каби бир қатор давлат арбоблари қатнашди. Шунингдек, Миср, Камбоджа, Непал ва Арманистон ҳукуматлари раҳбарлари ҳамда БМТ бош котиби Антониу Гутерриш ҳам маросимда иштирок этди.
Ўзбекистон раҳбари ва рафиқасини саммит мезбони – Хитой президенти Си Жинпинг ва унинг рафиқаси самимий ва илиқ муносабат билан кутиб олди. Бу олий даражадаги самимий муносабат тадбирга алоҳида руҳ бағишлади.
Кейинроқ хорижий делегация етакчилари учун Шанҳай ҳамкорлик ташкилоти Тянцзин саммитига бағишланган бадиий концерт дастури намойиш этилди. Концерт орқали иштирокчиларга Хитой маданияти ва санъатининг гўзал намуналари тақдим этилди.
Бу учрашувлар нафақат сиёсий мулоқот майдони, балки мамлакатлар ўртасида дўстлик ва ҳамкорлик ришталарини мустаҳкамлашда муҳим аҳамият касб этди.