Японияда 23 ёшли йигит 83 ёшли аёлга уйланмоқчи

Японияда ғайриоддий муҳаббат ҳикояси кенг жамоатчилик диққат марказига тушди. Мамлакат матбуотида тарқалган хабарларга кўра, 23 ёшли йигит ўз синфдошининг 83 ёшли бувиси билан турмуш қуришни режалаштирмоқда. Бу воқеа ҳақида South China Morning Post хабар берди.

Маълум қилинишиича, уларнинг танишуви ўтган йилнинг 14 февралига — севишганлар кунига тўғри келган. Шундан кейин улар ўртасида аста-секин яқинлик шаклланиб, ярим йилдан сўнг қариндошларига ўз муносабатларини очиқ кўрсатган. Орадан кўп ўтмай, улар бир хонадонда бирга яшай бошлашган.

Оила аъзолари эса бу ғайриоддий қарорни тинч қабул қилган ва уларнинг бир-бирини қўллаб-қувватлашига розилик берган. Аёлнинг ҳаёти ҳам ўзига хос воқеаларга бой: у илгари боғбон бўлиб ишлаган, йирик ботаника боғига эгалик қилган, икки марта турмуш қурган. Унинг бир ўғли, бир қизи ва беш набираси бор. Сўнгги ажрашувдан кейин у ўғли билан бирга яшаб келган.

Жуфтлик ҳақидаги суҳбат ва интервьюлар эса қисқа фурсатда ижтимоий тармоқларда катта қизиқиш уйғотди. Кимдир уларни қўллаб-қувватлаб, “муҳаббат ёш танламайди” дея фикр билдирган бўлса, айрим фойдаланувчилар ёш фарқи жуда катта эканини таъкидлаб, йигитнинг қарорини кескин танқид қилмоқда.

Японияда ҳам, халқаро майдонда ҳам бу воқеа кенг муҳокамаларга сабаб бўлиб, инсонлар орасида муҳаббат, қарашлар хилма-хиллиги ва жамиятдаги стереотиплар ҳақида турли саволларни ўртага чиқарди. Мутахассисларнинг таъкидлашича, бундай ғайриоддий муносабатлар кўпинча жамиятни икки қутбга бўлиб юборади: кимдир бuni эркин танлов деб билса, бошқалар уни қабул қила олмайди.

Шу тариқа, япон йигит ва кексайган аёлнинг ҳикояси оддий оилавий қарордан кўра кенгроқ ижтимоий баҳсга сабаб бўлди. Энди жамоатчилик уларнинг келажагини қизиқиш билан кузатмоқда.