НАТО Польшанын аба мейкиндиги бузулганына байланыштуу операция баштайт
НАТО орусиялык дрондордун Польшанын аба мейкиндигин бир нече жолу бузганына байланыштуу “Чыгыш күзөтчүсү” операциясын баштап, уюмга кирген өлкөлөрдүн Орусия жана Беларус менен чектеш аймактарын бекемдөө аракетин көрөт.
Бул тууралуу жума күнү НАТОнун баш катчысы Марк Рютте билдирди. Анын айтымында, операциянын башталганы тууралуу Түндүк Атлантика альянсынын Куралдуу күчтөрүнүн Европадагы башкы командачылыгы Алексус Гринкевич жарыялады.
“Бул операция жакынкы күндөрү башталат жана ага көптөгөн каражат менен күч тартылат”, - деген Рютте айрыкча учкучсуз учактардан келген коркунучтарды жок кылууга басым жасаларын кошумчалады.
Ага Дания, Франция, Улуу Британия жана Германиянын аскерлери катышат.
АКШнын куралдуу күчтөрүнүн генералы Гринкевич НАТО альянска кирген аймактардын ар бир дюймуна чейин коргой турганын билдирди.
НАТО тараткан маалыматка караганда, операциянын мөөнөтү жок. НАТОнун Чыгыш флангында абадан коргонуу аракеттери күчөтүлөт. Маалыматта белгиленгендей, Дания операцияга катышуу үчүн эки F-16 истребителин, абадан коргонуу системасы менен жабдылган фрегат кемесин жөнөтөт. Франция үч “Рафаль", Германия төрт "Еврофайтер" истребителин жиберет.
Польшанын Ички иштер министрлиги 11-сентябрда жети жерде 16 учкучуз учактын сыныктары табылганын билдирген. Ага чейин өлкөнүн аба мейкиндигин 19 дрон бузганы кабарланып келген.
НАТО орусиялык дрондор Польшанын аба мейкиндигин атайылап бузду деп эсептейт, бирок аны чабуул катары сыпаттабайт деп маалымдалган.
Москва Польшанын үстүнөн учкан дрондор орусиялык болгонун кыйыр түрдө четке каккан.
Франция менен Германия соңку абалга байланыштуу өз өлкөлөрүндөгү Орусиянын элчилерин чакырган. Соңку жагдай БУУнун Коопсуздук кеңешинде каралары күтүлүүдө.