Эрлинг Холанд “Сити”даги катта ўзгаришлар ҳақида гапирди
“Манчестер Сити”нинг асосий ҳужумчиси Эрлинг Холанд охирги икки трансфер ойнаси давомида жамоада содир бўлган жиддий ўзгаришларга ўз муносабатини билдирди.
Маълумки, манчестерликлар ўтган йилнинг ёзидаёқ 200 миллион еврога яқин маблағ сарфлаб, янги футболчиларни таклиф қилишди ва чиқиш трансферларидан тахминан 70 миллион евро ишлаб топишди. Бу йилнинг қишки трансферида эса Абдуқодир Ҳусанов, Умар Мармуш, Нико Гонсалес ва Витор Рейс каби номдор ўйинчилар учун 200 миллион евродан ортиқ маблағ йўналтирилди.
Норвегиялик голеадорнинг сўзларига кўра, жамоадан жуда кўп муҳим ўйинчилар кетгани учун энди янги келганлар ўз сўзини айтиши зарур. “Биз жамоада анчадан бери ўйнаб келаётганлар масъулиятни зиммамизга олишимиз керак. Шу билан бирга, янги ижрочиларнинг жамоага тезроқ кўникиши учун ёрдам беришимиз катта аҳамиятга эга”, – деди Холанд.
Шунингдек, у айрим футболчиларга янги муҳитга кўникиш учун вақт керак бўлишини ҳам таъкидлади. “Биз бир-биримизга ёрдам беришимиз шарт. Энди ‘Сити’ аввалгидек эмас, жамоада жиддий ўзгаришлар бўлди. Лекин буни ижобий томонга буриш мумкин, чунки бизда мутлақо бошқа сифатлар шаклланди”, – дея фикр билдирди Эрлинг Холанд.
Шу тариқа, ҳужумчи клубдаги ўзгаришлар янги босқичга олиб чиқишига ишончи комиллигини билдирди.