Конор Макгрегор: «Илон Маск – инсониятнинг ҳақиқий қаҳрамони»
Енгил вазн тоифасида собиқ UFC чемпиони ҳисобланган машҳур ирландиялик жангчи Конор Макгрегор яқинда жамоатчиликка сир бўлиб келган маълумотни ошкор қилди. Унга кўра, Ирландияда бўлиб ўтадиган президентлик сайловлари олдидан у дунёнинг энг бой инсонларидан бири, машҳур тадбиркор Илон Маск билан мулоқот қилиш шарафига эга бўлган.
Макгрегорнинг таъкидлашича, суҳбат давомида Маск унга қимматли маслаҳатлар берибгина қолмай, балки ўз ёрдамини ҳам таклиф этган.
«Илон ҳақиқий суперқаҳрамон, замонамиз қаҳрамони. У менга кўп вақт ажратди, суҳбатлашди ва қўллаб-қувватлашини билдирди. У ҳатто молиявий ёрдам кўрсатишни ҳам таклиф қилди, аммо мен бу таклифни рад этдим. Чунки мен бу ерда пул ёки бойлик учун эмасман. Мен учун бу йўл – ғоя ва халқ хизмати йўли. Илон эса инсониятнинг катта ютуғи, унинг шахсий ташаббуслари ва илмий саъй-ҳаракатлари бутун дунёда катта аҳамиятга эга. Мен бунга чинакам ҳурмат билан қарайман», — деди Макгрегор.
Маълумот учун, Ирландияда президентлик сайловлари жорий йилнинг 24 октябр куни ўтказилиши белгиланган. Бу сиёсий жараён нафақат мамлакат, балки халқаро майдонда ҳам катта қизиқиш уйғотмоқда.
Шундай экан, Конор Макгрегорнинг сиёсий саъй-ҳаракатлари ва унинг Илон Маск каби нуфузли шахслар билан алоқаси ирланд жамоатчилигида албатта катта муҳокамаларга сабаб бўлади.