"Манчестер Сити" юлдузлари "Арсенал"га қарши қасос режасини очиқ қилди

Англия Премьер-лигасининг 5-туридан ўрин олган «Арсенал» — «Манчестер Сити» супердуэли олдидан «шаҳарликлар»нинг етакчи футболчилари Бернарду Силва ва Родри мухлислар билан самимий суҳбат қуришди. Улар ўтган мавсумдаги 1:5 ҳисобидаги оғир мағлубият ҳақида фикр билдириб, бу сафар бутунлай бошқача «Сити»ни кўриш мумкинлигини таъкидлашди.

Бернарду Силва ўша кечани ёдга олиб, жамоанинг ўта мўрт ҳолатда бўлганини айтди:
— «Бу биз учун жуда оғир лаҳза эди. Бирорта йўлга қўйилган хатонинг оқибатида бутун ўйин издан чиқади. Руҳий жиҳатдан ҳам, майдондаги ҳаракатларимизда ҳам заифлик бор эди. «Арсенал» эса қон ҳидини сезиб, устунлик қилди ва имкониятни бой бермади. Бундай рақибларга қарши доим максимал даражада бўлиш шарт».

Родри эса жамоанинг асосий қуроли ҳақида тўхталиб, қасос кайфиятини яширмади:
— «Йиллар давомида биз учун руҳий устунлик энг катта қурол бўлиб келди. Ҳатто ишлар кўнгилдагидек кетмаганда ҳам, чемпионлик менталитети сабаб ўзимизни кўрсата олдик. Аммо ўтган мавсумда «Арсенал»га қарши ёмон даврга тушиб қолдик ва улар бундан фойдаланишди. Энди эса уларга ҳозирги «Сити» мутлақо бошқача эканини кўрсатиш истагимиз бор».

Силва ва Родри ўртасида «қасос» сўзи ҳақида қизиқарли мулоқот ҳам кечди. Силва бу атамани ёқтирмаслигини айтса-да, Родри бу сўз ортидаги куч ва руҳий кайфият муҳимлигини таъкидлади.

«Арсенал» — «Манчестер Сити» жангги бугун, 21 сентябр куни, Тошкент вақти билан 20:30да старт олади. Мухлислар нафақат икки топ-клуб тўқнашувини, балки жамоалар ўртасидаги ортиқча ҳиссиёт ва принципиал курашнинг ҳам гувоҳи бўлишади.