Фаластин давлатини тан олиш жараёни янги босқичга чиқди
Фаластин ташқи ишлар вазири ўринбосари Умар Авадалланинг таъкидлашича, Ғазо секторида давом этаётган қурбонлар ва Исроилнинг Ғарбий қирғоқ ҳамда Қуддусдаги ҳаракатлари халқаро ҳамжамиятнинг позициясига катта таъсир кўрсатган. Унинг фикрича, Фаластин давлатчилигини тан олиш жараёни сўнгги ойларда сезиларли даражада тезлашди ва бу йиллар давомида олиб борилган дипломатик саъй-ҳаракатларнинг мантиқий натижаси ҳисобланади.
Авадалла таъкидлаганидек, бу жараён фақат сиёсий йўл билан амалга оширилган муваффақият эмас, балки Фаластин халқининг ҳуқуқлари поймол қилиниши ва уларга қарши олиб борилаётган қирғинлар фонида юзага келган воқеликдир. Унинг фикрича, халқаро эътирофлар «икки давлат ечимини амалга ошириш йўлидаги энг муҳим амалий қадам» сифатида аҳамият касб этмоқда.
Шу билан бирга, вазир ўринбосари «Фаластин давлатисиз янгича Яқин Шарқ яратиш ғояси ҳеч қачон амалга ошмайдиган саробга айланганини» қайд этди.
Сўнгги ҳафталарда Буюк Британия, Канада ва Австралия Фаластин давлатини расман тан олганини эълон қилди. Яқин кунларда Франция ҳам шундай қарор қабул қилиши кутиляпти. Бугунги кунга келиб, БМТга аъзо 193 давлатдан 147 таси Фаластинни аллақачон суверен давлат сифатида эътироф этган.
Шу тариқа, халқаро миқёсдаги тенденциялар Фаластин давлатчилигини тан олиш жараёнининг янги босқичга кўтарилганини англатмоқда. Мутахассислар фикрича, бу жараён кейинги геосиёсий воқеаларга ҳам жиддий таъсир кўрсатиши мумкин.