Хаби Алонсо "Атлетико"дан учраган йирик мағлубият ҳақида нималар деди?

Ла Лиганинг 7-туридан ўрин олган дербида "Реал Мадрид" жамоаси Мадриднинг бошқа клуби "Атлетико" меҳмони бўлиб, 5:2 ҳисобида йирик мағлубиятга учради. Катта қизиқиш билан кутилган ўйин сўнгги пайтларда яхши спорт формасини намойиш қилаётган "қаймоқранглилар" учун кутилмаган натижа билан якунланди.

Учрашувдан кейин "Реал"нинг бош мураббийи Хаби Алонсо журналистлар олдида чиқиш қилиб, жамоа ҳаракати ва майдондаги камчиликлар ҳақида тўхталиб ўтди. Испаниялик мутахассисга кўра, бу сафар жамоаси кўплаб йўл қўйилган хатолар оқибатида тўлиқ мағлубиятга лойиқ бўлган.

– "Ёмон ўйин кўрсатдик ва оғриқли мағлубиятни қабул қилдик. Бугун бизга кўп жиҳатлар етишмади. Тўп назоратини йўқотдик, дуэлларда ютқаздик, вазият ярата олмадик. Натижада рақибга ҳаддан ташқари кўп имконият бериб қўйдик. Биз барча жабҳаларда ютқаздик ва ўз даражамизни кўрсата олмадик", – деди Алонсо.

Мураббийнинг айтишича, бу мағлубият жамоа учун дарс сифатида хизмат қилиши лозим. – "Мавсумдаги илк йўқотишимиз бўлди. Бу оғир, аммо шундан сабоқ олиб, ўз ўйинимизни яхшилашимиз шарт. Буни таҳлил қиламиз ва тузатишга ҳаракат қиламиз. Биз ҳали шаклланиш босқичида турибмиз, прогресс йўлидамиз", – дея қўшимча қилди испаниялик мураббий.

Алонсо айни пайтда жамоа хатолардан тўғри хулоса чиқариши ва келгуси баҳсларда ўз ўйинини кучайтириши кераклигини таъкидлади. – "Иккинчи таймда ҳам кутилган даражада ҳаракат қила олмадик. Бундан сабоқ олиб, кейинги ўйинларда тўғри йўлга тушишга интиламиз", – деди у.

Эндиликда "Реал Мадрид" навбатдаги баҳсда "Вильярреал" билан куч синашиши кутилмоқда. Ундан олдин эса клуб Еврокубок доирасида Қозоғистонга сафар қилиб, муҳим ўйин ўтказади.