Лионель Месси фаолиятини “Ньюэллс Олд Бойз”да якунлаши мумкин

Бир неча нуфузли манбаларнинг хабар беришича, саккиз карра “Олтин тўп” соҳиби Лионель Месси 2023 йилнинг ёзидан буён ўйнаб келаётган АҚШнинг “Интер Майами” клуби билан янги шартнома бўйича келишувга эришгани ҳақида маълумотлар тарқалган эди. Унга кўра, аргентиналик юлдуз клуб билан 2028 йилнинг охиригача давом этадиган янги битим тузиши кутилган.

Бироқ, янги маълумотлар вазият бошқачалигини кўрсатмоқда. Испаниянинг нуфузли El Nacional нашрининг ёзишича, 38 ёшли Леонинг фикри ўзгарган. Манба таъкидлашича, Месси энди фаолиятини узайтириш эмас, балки яқин йилларда уни якунлаш ниятида. Бу қарорни у ўз юртида, футболига асос солган биринчи клуби — “Ньюэллс Олд Бойз” сафида амалга оширишга бел боғлаган.

Шу тариқа, дунё футболи афсонаси катта эҳтимол билан карьерасини Аргентина клубида якунлаб, ўзининг илк жамоаси шарафини яна бир бор олий минбарга олиб чиқишни орзу қилмоқда.

Мессининг Аргентина терма жамоасидаги келажаги ҳам ҳозирда ноаниқ. У 2026 йилги жаҳон чемпионатида майдонга тушадими-йўқми, ҳеч ким аниқ айта олмайди. Бироқ El Nacional таҳлилчилари фикрича, Лео ўзининг сўнгги мундиалида “Ньюэллс Олд Бойз” футболчиси сифатида иштирок этиб, қадрдон клубининг тарихини янада ёрқин саҳифалар билан бойитишни истаяпти.

Шубҳасиз, Мессининг қандай қарор қабул қилиши нафақат Аргентина, балки бутун дунё футболи ҳамжамияти учун катта қизиқиш уйғотмоқда. Унинг фаолияти, ўйнаган ҳар бир клуби ва миллий терма жамоаси билан ёзиб кетган тарихи аллақачон спорт афсонаси сифатида баҳоланмоқда.