“Ешкім бұзған жоқ“: 16 миллион қазақстандықтың деректері қалай тараған?
Биыл маусымда интернетке 16 миллион қазақстандықтың жеке деректері тарап кеткен еді. Жасанды интеллект және цифрлық даму вице-министрі Досжан Мұсалиевтің айтуынша, бұл хакерлік шабуыл немесе деректерді бұзу салдарынан болмауы мүмкін, - деп хабарлайды Tengrinews.kz тілшісі.
Мұсалиевтің айтуынша, деректер ақпаратқа қолжетімділігі бар заңды аккаунттар арқылы тараған болуы ықтимал.
"Ол заңды аккаунттардан "кеткен" болуы мүмкін деген нұсқа бар. Менің айтайын дегенім: оны ешкім бұзған жоқ. Яғни, ресми рұқсаты, логині мен құпиясөзі бар адам оны үшінші тұлғаларға берді немесе одан ұрлап алған. Осылайша, бүкіл дерекқор сол жерден алынған", - деді ол.
Шенеуніктің сөзінше, тексеру нәтижесінде таралған деректердің көп бөлігі 2022 жылғы екені анықталған.
"Бұл ақпаратқа кейінірек кейбір ұсақ мәліметтер қосылып, жаңартылғандай болған, бірақ негізгі бөлігі 2022 жылы ұрланған", - деп қосты вице-министр.
Қандай деректер тараған?
16 миллионнан аса жазба ашық тарап кеткен, бұл халықтың басым бөлігін қамтиды. Тұрғындардың мынадай жеке мәліметтері тарап кеткен: тегі, аты, әкесінің аты, жынысы, туған күні, ЖСН, мекен-жайы, тұрғылықты жері, телефон нөмірлері (ұялы, үй, жұмыс телефондары), азаматтығы, ұлты және тағы басқалары.
Сілтемесіз жаңалық оқисыз ба? Онда Telegram желісінде парақшамызға тіркеліңіз!