UFC 322: Маддаленанинг мураббийи Махачев билан жангни баҳолади

UFC ярим ўрта вазн чемпиони Жек Делла Маддаленанинг бош мураббийи Бен Вискерс россиялик Ислом Махачев билан бўладиган жанг ҳақида фикр билдирди. Унинг сўзларига кўра, бу тўқнашув услуб жиҳатидан Белал Муҳаммад билан бўлган эҳтимолий жангга нисбатан “анча қулай” кечиши мумкин.

“Бу жанг менга ёқади. Ислом анча классик услубда ҳаракат қилади — унинг нима қилаётганини кузатиш осонроқ. Белал билан бўлган жангда эса буни олдиндан тахмин қилиб бўлмас эди. Албатта, Махачев кичикроқ танага эга, лекин у вазн туширишда ҳеч қандай муаммога дуч келмайди. Шу билан бирга, вазн туширмаслиги унинг чидамлилигига қандай таъсир қилишини айтиш қийин. Бу Ислом учун янги синов бўлади,” — деди Вискерс “South Cross” нашрига берган интервьюсида.

Мураббий таъкидлашича, Махачевнинг ўтган йиллардаги устунлик билан қўлга киритган ғалабалари уни фаворит сифатида кўрсатса-да, Делла Маддалена бу баҳсга пухта тайёргарлик билан чиқмоқда.

“Биз рақибнинг кучли жиҳатларини яхши биламиз, лекин ҳар бир устунликка қарши жавоб тайёрланган. Жек учун бу имконият — ўзини дунё миқёсидаги энг кучли жангчи сифатида кўрсатиш синови бўлади,” — дея қўшимча қилди Вискерс.

Эслатиб ўтамиз, Ислом Махачев ва Жек Делла Маддалена ўртасидаги тўқнашув 16 ноябрь куни АҚШнинг Лас-Вегас шаҳрида бўлиб ўтадиган “UFC 322” турнирида ташкил этилади. Бу жанг Махачевнинг илк бор ярим ўрта вазндаги чиқиши бўлиши билан ҳам мухлислар учун алоҳида қизиқиш уйғотган.