Ислом Исмоилов: Жаҳон чемпионатида тарих ёзишни ният қилганмиз

Ўзбекистон U-17 терма жамоаси бош мураббийи Ислом Исмоилов FIFA расмий сайтига берган катта интервьюсида ёшлар термасининг руҳи, тайёргарлик жараёни ва келажак режалари ҳақида тўлиқ тўхталиб ўтди. Унда мураббий жамоанинг Осиё чемпионатидаги зафаридан кейинги ўзгаришлар, Жаҳон чемпионатига тайёргарлик жараёни, рақиблар таҳлили ва футболчиларнинг психологик ҳолати ҳақида самимий фикрлар билдирди, деб хабар берди fifa.com.

Исмоилов сўзларига кўра, Осиё чемпионлиги нафақат фахр, балки катта масъулият ҳам олиб келган. “Бу ғалаба жамоамизни янги босқичга олиб чиқди. Ҳар бир футболчида ишонч пайдо бўлди, энди биз икки баробар кўп меҳнат қилаяпмиз. Жаҳон чемпионатидаги асосий вазифамиз — ўзимизни дунё саҳнасида кўрсатиш ва Ўзбекистон футболи учун янги тарих ёзиш”, — деди мураббий.

Унинг таъкидлашича, 2023 йилги Жаҳон чемпионатида терма жамоа чорак финалга қадар етиб борган мусобақадан жуда кўп сабоқлар олинган. “Ўша вақтдаги жамоа мураббийи билан суҳбатлар ўтказиб, ҳар бир ўйинни таҳлил қилдик. Энг муҳим хулоса — босим остида ҳам тўғри қарор қабул қилиш зарурлиги бўлди. Шунинг учун бу сафар тайёргарликда айнан қарор қабул қилиш тезлиги ва ўйин назоратига алоҳида эътибор бердик”, — дейди Исмоилов.

Мураббийнинг фикрича, Осиё ва жаҳон даражаларидаги ўйинлар орасидаги асосий фарқ — ўйин суръати ва фикрлаш тезлигида. “Европа ёки Жанубий Америка жамоалари қарши босимни кучайтиради, бу эса ўйинчилардан жуда тез фикрлашни талаб қилади. Биз машғулотларда айнан шунга тайёрландик — тез қарор қабул қилиш, вазиятни баҳолаш ва ўйинни назоратда ушлашга. Энди биз фақат мослашувчи жамоа эмас, ўйинни бошқарувчи жамоамиз”, — деди у.

Исмоилов тайёргарлик жараёни ҳақида ҳам тўхталиб ўтди. Унга кўра, Ўзбекистон футбол ассоциацияси томонидан терма жамоа учун махсус режа ишлаб чиқилган, бир қатор халқаро ўртоқлик учрашувлари ташкил этилган. “Рақибларимиз Парагвай, Ирландия ва Панама терма жамоаларининг тактикаси, кучли ва заиф жиҳатларини таҳлил қилдик. Ҳар бир рақибга қарши алоҳида стратегик режа тайёрладик”, — дея таъкидлади мураббий.

Ёш футболчиларнинг психологик ҳолати ва жисмоний тайёргарлиги ҳақида сўз юритар экан, Исмоилов бу ёшдаги спортчилар учун босимни енгиш энг катта синов эканини қайд этди. “Биз ҳар куни улар билан психологик машғулотлар ўтказамиз, жамоавий суҳбатлар ташкил этамиз. Босимдан қўрқмаслик ва ишонч билан ўйнаш — бугунги куннинг асосий вазифаси. Шу билан бирга, жисмоний ҳолатни юқори даражада ушлаб туриш учун замонавий дастурлар ишлаб чиқилган. Ҳар бир ўйинчи майдонда ўз салоҳиятини тўлиқ намоён эта олиши керак”, — деди у.

Интервью якунида Ислом Исмоилов Ўзбекистон мухлисларига ва ёш футболчиларга мурожаат қилди. “Бизнинг Осиё чемпиони бўлишимизда халқнинг ишончи катта роль ўйнади. Энди Жаҳон чемпионатида ҳам шу ишончни ҳис қилиб, фақат ғалаба учун курашамиз. Ёшларга эса шуни айтаман: имконият берилади — уни қадрланг. Истеъдод йўлни кўрсатади, аммо мақсадга меҳнат етказади”, — деб сўзини якунлади мураббий.

Исмоиловнинг бу сўзлари кўплаб мухлисларда янги умид уйғотди. Ёш терма жамоа энди нафақат натижа учун, балки Ўзбекистон байроғини дунё саҳнасида баланд кўтариш учун курашади.