Ҳафтанинг биринчи кунларида ҳаво салқинлашади ва шамол кучаяди

Ўзгидромет маълумотига кўра, 27–30 октябрь кунлари Ўзбекистон бўйлаб об-ҳаво ўзгарувчан бўлади. Айрим ҳудудларда ёмғир ёғиши, шамол кучайиши ва ҳарорат аста-секин пасайиши кутилмоқда.

Қорақалпоғистон ва Хоразмда 27–28 октябрда қисқа муддатли ёмғир ёғиши мумкин, кейинчалик ҳаво очилиб, 19–24 даража атрофида бўлади. Айрим жойларда шамол тезлиги 18 м/с гача етган ҳолда чанг тўзонлари кузатилиши эҳтимол қилинмоқда.

Бухоро ва Навоийда ҳам ҳафтанинг ўрталарида шамол кучайиши, айрим ҳудудларда ёмғир ёғиши мумкин. Ҳарорат кундузи 23–28 даража, кечаси эса 4–9 даража атрофида бўлади.

Тошкент, Сирдарё, Жиззах ва Самарқандда 28 октябрда қисқа муддатли ёмғир кузатилиши мумкин. Бошқа кунларда ёмғирсиз ва салқин ҳаво бўлади — кундузи 21–26 даража, кечаси 8–13 даража.

Қашқадарё ва Сурхондарёда 27 октябрда 29 даражагача илиқ бўлади, аммо кейинчалик ҳарорат пасайиб, 28–30 октябрда 23–28 даража атрофида бўлиши кутилмоқда.

Фарғона водийсида 28 октябрда қисқа ёмғир эҳтимоли бор, кейин ҳаво очилиб, ҳарорат кундузи 18–26 даража, кечаси 6–11 даража бўлади.

Тоғли ҳудудларда 28 октябрда ёмғир, баланд тоғларда эса қор ёғиши мумкин. Ҳарорат кундузи 13–20 даража, кечаси 3–8 даража атрофида бўлади.

Синоптиклар таъкидлашича, ҳафта бошиданоқ кузнинг ҳақиқий салқини сезила бошлайди — айниқса, шамолли ва ёмғирли кунларга тайёргарлик кўриш тавсия этилади.