Паркентда Cobalt 9 ёшли болани уриб, судраб кетди
Тошкент вилоятининг Паркент туманида рўй берган йўл-транспорт ҳодисаси ижтимоий тармоқларда кенг муҳокама қилинди. Ҳодисада 9 ёшли бола жароҳат олгани ҳақида вилоят Йўл ҳаракати хавфсизлиги бошқармаси расмий маълумот берди.
Маълумотларга кўра, воқеа 18 октябрь куни соат 11:00 атрофида D-015 (“Қизилтоғ – Паркент – Янги бозор”) йўлининг 57-чақириғида содир бўлган. 39 ёшли ҳайдовчи Х.Д бошқарувидаги Cobalt автомашинаси пиёдалар ўтиш жойидан югуриб ўтаётган 2016 йилда туғилган болани уриб юборган.
Натижада бола тан жароҳати олган ва туман марказий шифохонасига етказилган. Ҳозирда унинг аҳволи барқарор, шифокорлар кузатувида даволанмоқда.
ЙҲХБ маълумотига кўра, ижтимоий тармоқларда тарқалган “бола ҳалок бўлди” деган хабарлар ҳақиқатга тўғри келмайди.
Шунингдек, ҳодисада Damas автомобили ҳайдовчиси ҳам қатнашгани қайд этилган. Воқеа бўйича Паркент тумани ички ишлар бўлими томонидан терговга қадар текширув ишлари олиб борилмоқда.
Ҳуқуқ-тартибот идоралари фуқаролардан расмий манбалар орқали аниқланган маълумотларга ишонишни сўрамоқда.