Лувр музейидаги йирик ўғирлик бўйича икки гумонланувчи қўлга олинди
Франция ҳуқуқни муҳофаза қилиш органлари бир ҳафта олдин дунёдаги энг машҳур музей — Луврда содир этилган йирик ўғирлик иши бўйича икки нафар гумонланувчини қўлга олди, деб хабар берди bbc.com ва бу маълумотни Париж прокуратураси ҳам тасдиқлади.
Расмийлар ҳозирча ушланганлар сонини очиқламай туришмоқда, аммо дастлабки маълумотларга кўра, улардан бири “Париж – Шарл-де-Голл” аэропортида хорижга парвоз қилиш арафасида тўхтатилган. У иккинчи ҳамроҳидан бир неча соат олдин қўлга тушган. Кейинчалик иккинчи гумонланувчи Париж четидаги Сен-Сен-Дени шаҳарчасида ушланган.
Манбаларнинг айтишича, ҳар икки шахс аввалдан полиция рўйхатида бўлган ва жиноий фаолият билан шуғулланган деб гумон қилинган. AFP маълумотига кўра, гумонланувчилардан бири Жазоирга йўл олаётган самолётга чиқмоқчи бўлган.
Эслатиб ўтамиз, Луврдаги қўпол талончилик ўтган якшанба куни кундузи содир бўлганди. Жиноятчилар музейга зинапоя орқали кириб, дераза ойнасини кесиш орқали ичкарига тушишган ва олдиндан белгиланган буюмлар сақланган металл сейфларни очиб, қимматбаҳо артефактларни олиб қочишган.
Талончилик атиги саккиз дақиқа давом этган ва унда ниқоб таққан тўрт киши иштирок этган. Улардан иккитаси бино ичига кирган, қолганлари ташқарида кузатувчи сифатида ҳаракат қилган. Терговчиларнинг тахминича, бу жиноят яхши режалаштирилган ва касбий тарзда амалга оширилган.
Париж прокурори Лора Беккуа бу ҳақда шанба куни BBC сўровига жавобан шундай деди:
«Терговчилар 25 октябрь куни кечқурун ҳибсга олишни амалга оширганини тасдиқлайман. Гумонланувчилардан бири мамлакатни тарк этишга уриниб турган. Ҳозир тергов қизғин босқичда ва сўроқ жараёни 96 соатгача давом этиши мумкин».
Прокурор тергов маълумотлари жамоатчиликка эрта етказилганидан афсусдалигини билдириб, бу ҳолат тергов ишларига салбий таъсир кўрсатиши мумкинлигини таъкидлади:
«Ҳозирча қўшимча тафсилотлар беришга эрта. Бу маълумотларни ошкор қилиш терговчиларнинг ишини қийинлаштиради», — деди у.
Маълум бўлишича, ўғирланган буюмлар орасида XIX асрга мансуб, Наполеон Бонапарт ва унинг оила аъзоларига тегишли бўлган олмос ва қимматбаҳо тошлар билан безатилган тақинчоқлар, диадемалар ва маржонлар бор. Улар умумий қиймати 88 миллион еврога (тахминан 102 миллион доллар) баҳоланмоқда.
Айрим экспертлар фикрича, ўғрилар буюмларни аллақачон қисмларга ажратиб юборган бўлиши мумкин — яъни тошлар ва металллар алоҳида олинган ва уларни тарихий қийматига нисбатан арзон нархда сотиш эҳтимоли бор.
Франция адлия вазири бу воқеани мамлакат маданий меросига етказилган катта зарар деб атади ва музейдаги хавфсизлик протоколларининг етарлича ишламаганини тан олди.
Шу билан бирга, жиноят жойи яқинида икки буюм — жумладан, императрица Евгенияга тегишли тож ҳам топилган. Эҳтимол, ўғрилар уларни қочиш пайтида ташлаб кетган ёки йўқотиб қўйган бўлиши мумкин.
Тергов ҳали давом этмоқда. Франция матбуоти бу ҳодисани “аср ўғирлиги” деб атади — чунки у нафақат молиявий, балки маданий ва тарихий жиҳатдан ҳам улкан йўқотиш ҳисобланади.