Миржалол Қосимов: “Футболда ҳамма ўйинни ютишнинг иложи йўқ”
Суперлиганинг 26-туридан ўрин олган баҳсда ОКМК ўз майдонида “Насаф”ни қабул қилди. Қизғин ва курашларга бой кечган ўйин 1:1 ҳисобидаги дуранг билан якунланди. Учрашувдан сўнг мезбонлар бош мураббийи Миржалол Қосимов матбуот анжуманида иштирок этиб, жамоаси ўйини ҳақида фикр билдирди.
Мураббийнинг айтишича, ҳар икки жамоа ғалаба учун майдонга чиққан, аммо майдон ҳолати техник футбол намойиш этишга маълум даражада тўсқинлик қилган.
“Иккала жамоа ҳам ғалаба учун майдонга тушганди. Ҳар икки жамоа комбинацион, мазмунли футбол кўрсатишга интилади. Аммо майдон ҳолати бугун шундай бўлдики, тўпни назорат қилиш қийин бўлди. Барибир ўйин охирига қадар ҳамма ғалаба учун курашди. Бу жиҳатдан футболчиларимдан миннатдорман”, — деди Қосимов.
Унинг таъкидлашича, “Насаф”нинг чемпионлик учун очколар йиғишга эҳтиёжи катта бўлгани “ОКМК” футболчиларида қўшимча руҳий босим яратмаган.
“Фарқи йўқ, рақибга қанча очко керак бўлмасин, ҳар бир ўйинчи ўзига юклатилган вазифани бажариши керак. Руҳий жиҳатдан синиш — футболнинг бир қисми. Шундай бўлса ҳам, биз ҳар ўйинда сўнгги дақиқаларгача курашишни ўрганишимиз керак. Футболда ҳар доим ғалаба қозониб бўлмайди, баъзан омад, баъзан рақибнинг қаршилиги ҳал қилувчи бўлади”, — дея қўшимча қилди мураббий.
Шу билан бирга, Қосимов жамоа захирасидан тушган футболчиларнинг ўйинга мослашишидаги қийинчиликлар ҳақида ҳам тўхталиб ўтди.
“Голдан кейин захирадан тушган футболчилар тўлиқ ўйинга мослаша олмади. Масалан, Аҳмад олдинда бўш жойни кўрмади ва орқага узатди — натижада имконият қўлдан кетди. Фарғонадаги баҳсда эса захирадан тушганлар ўйинни кучайтирганди. Шунинг учун ҳар бир алмашув ўйинга фойда бериши керак”, — деди у.
Миржалол Қосимов фикрича, “ОКМК” ҳозирги босқичда натижаларни барқарорлаштириш учун жамоавий ҳаракатни мустаҳкамлаши лозим.
“Футбол жамоавий ўйин. Бир ўйинчига айбни ағдариш нотўғри. Муҳими — барча бир мақсад йўлида ҳаракат қилиши. Бизда жамоа бор, энди унинг ички ишончини мустаҳкамлаш керак”, — дея якунлади мураббий.