Мактаб раҳбарлари энди KPI асосида бонус олади

Ўзбекистонда мактаб директорлари, уларнинг ўринбосарлари ва ўқитувчиларига меҳнат самарадорлигига қараб ойлик устама ҳақлар жорий этилди, деб хабар берди Вазирлар Маҳкамаси.

Янги тизимга кўра, таълим муассасалари раҳбарлари ва педагоглар фаолияти KPI — асосий иш кўрсаткичлари бўйича баҳоланади. Уларга тўланадиган бонуслар ҳар ой тўпланган баллар асосида белгиланади.

Директорлар учун 61–70 балл тўплаганларга 3 фоиз, 71–80 баллга — 10 фоиз, 81–90 баллга — 15 фоиз, 91–100 балл тўплаганларга эса 20 фоиз устама ҳақ берилади. Директор ўринбосарлари учун эса бу кўрсаткичлар 2,5 фоиздан 10 фоизгача бўлади.

Бонус олиш ҳуқуқи мактабда раҳбарлик лавозимида камида тўққиз ой фаолият юритган шахсларга берилади. Баҳолаш мезонлари ўқувчиларнинг билим даражаси, фан олимпиадаларидаги ютуқлар, ижодий фаоллик ва тарбиявий ишлар самарадорлигини қамраб олади.

Шунингдек, “Заковат” тўгараклари раҳбарларига ойлик маошнинг 50 фоизи миқдорида бир марталик бонус берилади. Жисмоний тарбия ўқитувчилари эса фаолияти самарадорлигига қараб 20 фоизгача рағбат пули олади.

Мутасаддилар таъкидлашича, ушбу тизим ўқитувчилар меҳнатини адолатли баҳолаш, касбий маҳоратни ошириш ва таълим сифатига ижобий таъсир кўрсатишга қаратилган.