5 май энди “Касб ва меҳнат куни” сифатида нишонланади
Ўзбекистонда 5 май куни эндидан бошлаб “Касб ва меҳнат куни” сифатида нишонланади.
Бу ҳақда давлат раҳбарининг “Касбий таълим тизимида ислоҳотларни амалга ошириш чора-тадбирлари тўғрисида”ги қарорида қайд этилган. Ҳужжатга кўра, янги байрам доирасида ёшлар ўртасида касблар нуфузини ошириш, меҳнатга рағбат уйғотиш ва касбий таълимни оммалаштириш бўйича турли тадбирлар ўтказилади.
Қарорда касбий таълим тизимини 2030 йилгача ривожлантириш бўйича бир қатор муҳим мақсадлар белгиланди. Хусусан, халқаро ва қўшма таълим дастурларига эга техникумлар сони 250 тага етказилади. Шу билан бирга, 9-синф битирувчиларининг касбий таълим билан қамрови амалдаги 29 фоиздан 50 фоизгача оширилади.
Педагоглар учун ҳам катта имкониятлар яратилади — уларнинг хорижда малака ошириш ва стажировка дастурларида иштирок этиш сони 100 нафардан 2 500 нафаргача кўпайтирилади.
Шунингдек, мактабнинг 10-синф ўқувчиларига ўз ўқишини техникумларга кўчириш имкони берилади. Бу эса ёшларга эртароқ амалий касб эгаллаш имконини яратади.
2026 йилдан бошлаб “Касб ва меҳнат куни” ҳар йили кенг нишонланади. Мутахассислар фикрича, бу ташаббус ёшлар орасида касб танлашга қизиқишни кучайтиради ва меҳнатга бўлган муносабатни янги босқичга олиб чиқади.