АҚШнинг Мадурони ўғирлаш учун учувчини ёллашга уриниши фош бўлди
Associated Press’нинг ёзишича, АҚШ Ички хавфсизлик вазирлигида хизмат қилувчи агент Николас Мадуронинг шахсий учувчисини ёллаш орқали уни ҳибсга олиш режасини амалга оширишга уринган.
Маълумотларга кўра, режа 2024 йил апрел ойида ишлаб чиқилган бўлиб, Доминикана Республикасидаги АҚШ элчихонасида атташе сифатида ишлаган 50 ёшли агент Эдвин Лопесга топширилган. Унинг мақсади — Венесуэла президентини АҚШ қўлга олиши мумкин бўлган ҳудудга олиб бориш эди.
Ахборотчилар Лопесга Мадуро фойдаланадиган Dassault Falcon 2000EX ва Dassault Falcon 900EX самолётлари Санто-Домингода таъмирланаётганини маълум қилган. Ушбу лайнерларга бош учувчи генерал Битнер Вилегас бошчилигида беш нафар пилот хизмат кўрсатарди.
АҚШ агентлари учувчиларни сўроқ қилган, аммо уларнинг Мадуро билан қандай алоқада эканини аниқлай олмаган. Суҳбат охирида Лопес Вилегасга катта мукофот эвазига президентни Доминикана, Пуэрто-Рико ёки Гуантанамо ҳарбий базасига етказишни таклиф қилган. Учувчи жавоб бермаган, бироқ телефон рақамини қолдирган — агентлар буни "яхши белги" деб баҳолаган.
Кейинроқ, самолётлар Венесуэлага қарши санкциялар доирасида мусодара қилинган. Шу билан бирга, Лопес Вилегас билан 16 ой давомида алоқада бўлиб, уни режага кўндиришга уринишда давом этган. У ҳатто 2025 йил июлда нафақага чиққанидан сўнг ҳам учувчи билан ёзишувни тўхтатмаган.
Август ойида АҚШ Мадурони қўлга олишда ёрдам берганларга мукофотни 50 миллион долларгача оширгани маълум бўлганидан сўнг, Лопес бу ҳақда Вилегасга хабар юборган. Аммо шундан кейин учувчи агент билан боғланишни тўхтатган.
Associated Press маълумотларига кўра, режа амалга ошмаганидан сўнг агент ва унинг ҳамфикрлари Мадурони асабийлаштиришга қарор қилган. 19 сентябрь куни собиқ АҚШ амалдори ва Венесуэла мухолифатига яқин шахс Маршалл Биллингсли Вилегасни ижтимоий тармоқда туғилган куни билан табриклаб, Доминиканада олинган суратни эълон қилган.
Қизиғи, у постни Мадуро самолёти Каракасдан учиб чиқишидан атиги бир дақиқа олдин жойлаштирган. Ортидан самолёт 20 дақиқада аэропортга қайтган. Бу воқеа Венесуэлада катта шов-шув келтириб чиқарган.
Баъзи мухлислар Вилегас ҳукумат томонидан сўроққа чақирилганини тахмин қилган бўлса, бошқалар уни қамаб қўйишлари мумкинлигидан хавотир билдирган. Бир неча кундан сўнг генерал давлат телевидениесида пайдо бўлиб, венесуэлалик учувчиларнинг садоқати ҳақидаги тарғибот дастурида иштирок этди.
Associated Press ушбу воқеани ҳақиқий жосуслик триллерига қиёслади. Нашрга кўра, бу ҳолат АҚШнинг сўнгги йилларда Николас Мадурони ағдаришга бўлган уринишлари қай даражада қаттиқ ва айни пайтда хатарли эканини яна бир бор кўрсатиб берди.