Африкада жингалак сочли шер тармоқларни портлатди
Кениядаги машҳур Масаи-Мара миллий қўриқхонасида олинган жингалак ёлли шер сурати интернетда катта шов-шувга сабаб бўлди.
Суратни ёввойи табиат фотографи Камбиз Камео Пургханад олган бўлиб, у унинг энг ноёб кадрларидан бири сифатида таърифланган. Тасвирдаги шер Нзури M6 деб аталади — у Олеполоснинг ўғли ва илгари Топи-Приде гуруҳига мансуб бўлган. Ҳозир эса еттита шердан иборат янги гуруҳ етакчиларидан бири ҳисобланади.
Суратда шернинг табиий жингалак ёли ва ўзига хос қиёфаси кўплаб ижтимоий тармоқ фойдаланувчиларининг эътиборини тортди. Фотографнинг сўзларига кўра, “Нзури Масаи-Марадаги энг гўзал шерлардан бири бўлиб, Африкадаги Бон Жови ёки Блонди каби рамзий жонзотлар қаторига кириши мумкин”.
Камбиз Камео аслида учувчи бўлса-да, табиатга бўлган муҳаббати туфайли йиллар давомида ёввойи жонзотларни суратга олиб келмоқда. Унинг таъкидлашича, бу кадр “табиатдаги энг кам учрайдиган ва ҳақиқатан ҳайратланарли гўзалликлардан бири”дир.
Мутахассислар фикрича, бундай фотосуратлар инсонни табиатга янада яқинлаштиради ва ёввойи ҳаётнинг нафосатини қайта кашф этишга ундайди.