Ўзбекистонда кўп қаватли уйлар таъмирдан ўтказилди
Куз-қиш мавсумига тайёргарлик доирасида Ўзбекистон бўйлаб қарийб 9,8 мингта кўп қаватли уйлар капитал таъмирдан чиқарилди. Бу жараёнда бинолар томлари ва фасадлари янгиланди, ички муҳандислик тизимлари модернизация қилинди, подвалар ва кириш жойлари тартибга келтирилди.
Дастур доирасида 244 миллиард сўм маблағ ажратилган. Қўшимча равишда хавфсизлик ва қулайликни ошириш мақсадида 1,5 мингта кодли қулф билан жиҳозланган металл эшиклар ўрнатилди, 14,6 минг квадрат метр шиша пакетлар ва 70 мингга яқин энергия тежовчи ёритиш ускуналари ўрнатилди.
Шунингдек, лифт хўжалигини модернизация қилиш ишлари олиб борилмоқда: режалаштирилган 500 дан ортиқ лифтлардан 300 таси аллақачон ўрнатилган, қолганларини алмаштириш ишлари давом этмоқда. Яшаш хонадонларида энергия самарадорлигини ошириш мақсадида қуёш панеллари ва коллекторлар ўрнатила бошланди.
Хонадонларда иссиқликни яхшироқ сақлаш учун 195 минг квадрат метр фасад базальт материали билан қопланди. Ушбу чора-тадбирлар 20 миллион киловатт электр энергияси ва 2,8 миллион кубометр табиий газни тежаш имконини беради, деб кутилмоқда.
Бундан аввал Қурилиш ва уй-жой коммунал хизмат кўрсатиш вазирлиги матбуот хизмати кўп қаватли уйлар аҳолисига кириш жойларини тозалаш бошқарув компаниялари ходимлари мажбуриятлари доирасига кирмаслигини тушунтирган эди.