Шкода Ўзбекистонда темир йўл ишлаб чиқаришини йўлга қўяди
Ўзбекистон чехиялик йирик муҳандислик компанияси "Шкода Group" учун муҳим ҳамкор бўлиб бормоқда. Компания Ўзбекистонда темир йўл транспортини йиғиш бўйича ишлаб чиқариш корхонасини ташкил этиш режасини эълон қилди.
Бу қарор "Шкода Group"нинг Марказий Осиёнинг истиқболли бозорини ўзлаштиришга қаратилган узоқ муддатли стратегиясининг бир қисми сифатида қабул қилинди. Янги корхона "Шкода Group"нинг Ўзбекистондаги шўъба корхонаси сифатида фаолият олиб боради ва фақатгина йиғиш жараёнлари билан чекланмайди.
У ҳаракат таркибини бутун эксплуатация даврида комплекс техник хизмат кўрсатишни ҳам амалга оширади. Шунингдек, лойиҳа доирасида махсус ташкил этиладиган "Шкода Академияси" орқали маҳаллий мутахассисларни тайёрлаш ва уларнинг малакасини ошириш ҳам муҳим вазифалардан бири бўлади.
"Шкода Group" бош директори Петр Новотнийнинг таъкидлашича, Марказий Осиё минтақаси узоқ вақтдан буён компаниянинг бизнес стратегиясидаги устувор йўналишлардан бири ҳисобланади. Унинг сўзларига кўра, Ўзбекистон раҳбарияти ва Европа бизнеси етакчилари ўртасидаги олий даражадаги мулоқотлар Европа технологиялари мамлакатнинг транспорт инфратузилмасини барқарор ривожлантиришга катта ҳисса қўшиши мумкинлигини тасдиқлади.
Мазкур лойиҳа Брюсселда ўтказилган учрашувда белгиланган келишувлардан келиб чиққан. Учрашувда Ўзбекистон Президенти Шавкат Мирзиёев ва Европанинг етакчи компаниялари вакиллари, жумладан, Петр Новотний ҳам иштирок этган эди.
Музокаралар икки томонлама ҳамкорликни янада чуқурлаштиришга қизиқиш борлигини тасдиқлади. Шу билан бирга, бу Шкода бренди учун Ўзбекистондаги илк йирик лойиҳа эмас.
2020 йилда "Ўзавтосаноат" ва "Volkswagen Group Rus" концерни ўртасида ҳамкорлик тўғрисида келишув имзоланган эди. Ушбу келишув Жиззах автомобиль заводида Volkswagen ва Шкода автомобилларини ишлаб чиқаришни ташкил этиш учун замин яратган.
Кейинчалик Шкода Auto собиқ бошқарув раиси Томас Шефер ҳам Ўзбекистонда ишлаб чиқариладиган моделлар турини кенгайтириш ниятини билдирган эди. Темир йўл соҳасидаги янги лойиҳа эса мавжуд ҳамкорликнинг мантиқий давоми ҳисобланади.
Аввалроқ "Ўзбекистон темир йўллари" эҳтиёжлари учун 30 та Шкода Group электр поездларини етказиб бериш бўйича 320 миллион евро қийматидаги шартнома имзоланган эди.