Роналдунинг ўғли ўзига қимматбаҳо Lamborghini сотиб олди
Португалия терма жамоаси ва Саудия Арабистонининг “Ал Наср” клуби етакчиси Криштиану Роналдунинг тўнғич ўғли — Криштиану Роналду Жуниор яна жамоатчилик диққат марказида. Сабаби, 15 ёшли йигит ўзининг илк ва жуда қиммат машинасини — оқ рангли Lamborghini Urus S моделини харид қилгани маълум бўлди. Бу ҳақда Telegrafi хабар берди.
Қайд этилишича, ёш Роналду ижтимоий тармоқда ўзининг янги автомобили билан суратга тушган ва бу интернетда тезда тарқалган. Машинанинг баҳоси тахминан 265 минг еврони ташкил этади.
Lamborghini Urus S — бу 650 от кучига эга турбинали V8 двигатель билан жиҳозланган суперкар бўлиб, атиги 3,5 сонияда 0 дан 100 км/соат тезликка чиқиши мумкин. Унинг максимал тезлиги эса 305 км/соатга етади.
Бироқ ҳозирча Роналду Жуниорнинг ҳайдовчилик гувоҳномаси йўқ. Саудия Арабистони қонунларига кўра, у фақат 18 ёшга тўлгачгина автомобилни мустақил бошқариш ҳуқуқига эга бўлади. Шу сабабли, ҳозирча у фақат йўловчи сифатида саёҳат қилиш билан чекланмоқда.
Машҳур футболчининг ўғли ёш бўлишига қарамасдан, ижтимоий тармоқлардаги фаоллиги ва спортга қизиқиши билан катта аудиторияга эга. Унинг отаси сингари машҳур футболчи бўлиш нияти ҳам бор.
Эслатиб ўтамиз, илгари Роналдунинг ўғли илк бор Португалия U-16 терма жамоасига чақирилган эди. Бу унинг спортдаги катта салоҳиятини яна бир бор исботлади.
Қисқаси, футбол юлдузининг ўғли нафақат майдонда, балки ҳаёт услубида ҳам “катталар сафида” эканини кўрсатмоқда.