Тошкентда 24 квадрат метрлик уйга 35 киши ёзилган
Пойтахтда уй-жой ижараси билан боғлиқ ҳайратланарли ҳолат аниқланди, деб хабар берди Давлат солиқ қўмитаси.
Маълумотларга кўра, “E-ижара” электрон тизими орқали ўтказилган мониторинг натижасида 24 квадрат метрлик хонадонга 35 нафар фуқаро рўйхатга қўйилгани маълум бўлди. Ҳисоблаб кўрилганда, ҳар бир киши улушига атиги 0,7 квадрат метр майдон тўғри келган — бу ҳатто кичик ёзув столи майдонидан ҳам оз.
Таҳлилда уй эгаси икки нафар талабага расмий ижара шартномаси тузиб, ҳар бирига 0,5 квадрат метрдан жой ажратгани ва ойига 1,5 миллион сўмдан ижара пули олгани аниқланган. Кейинроқ бу манзилда яна 33 киши қўшимча рўйхатдан ўтказилган.
Солиқ идораси бир киши учун белгиланган минимал яшаш майдони 16 квадрат метр эканини эслатиб, уй-жойни ижарага беришда нормаларга риоя этиш зарурлигини қайд этди. Шу билан бирга, ижарачилар учун муносиб ва инсонга хос шароит яратиш талаб этилиши таъкидланди.
Мутахассислар бу ҳолатни уй бозоридаги муаммолар ва назорат етишмаслигининг яққол мисоли сифатида баҳоламоқда.