“Реал” Витиньяга кўз тикди: музокаралар қийин кечиши мумкин
Европа футболидаги трансфер бозори яна жонланаётган бир пайтда, Мадриднинг “Реал” клуби навбатдаги катта ҳаракатни режалаштирмоқда. Испания гранди келаси мавсум учун ярим ҳимоя чизиғини кучайтиришни мақсад қилган ва бу борада Парижнинг “ПСЖ” жамоаси аъзоси Витинья асосий номзодлардан бирига айланган, деб хабар берди Fichajes.
Манбага кўра, мадридликлар парижликлар билан музокара бошлашга тайёрланмоқда ва ҳатто 100 миллион евролик таклифни ишлаб чиққан. Бу суммани клуб раҳбарияти келаси ёзда Витинья учун расман таклиф этишга тайёр экани айтилмоқда.
Бироқ бу трансферни амалга ошириш осон бўлмайди. ПСЖ хавбекни жамоанинг муҳим фигураларидан бири сифатида кўради ва унинг нархини 100–130 миллион евро оралиғида белгилаган. Бу эса мадридликлар учун катта молиявий тўсиқ ҳисобланади.
Шу билан бирга, Витиньянинг амалдаги шартномаси баъзи чекловларни ўз ичига олган. Яъни, шартнома бандлари клублар ўртасидаги музокараларни мураккаблаштиради. Шу сабаб “Реал” ҳозирча эҳтиёткор позицияни сақлаб, вазиятни диққат билан кузатмоқда. Агар келишувни амалга ошириш имкони бўлмаса, клуб ярим ҳимояни кучайтириш учун бошқа вариантларни кўриб чиқиши режалаштирилган.
Мадрид клуби кейинги мавсумда жамоа ўйинини янада мувозанатли қилишни кўзламоқда. Чунки жамоа яқин йилларда бельгиялик Эден Азар ва немис ярим ҳимоячиси Тони Кроос каби етакчиларни йўқотди. Энди эса “қироллик клуби” янги авлоднинг марказдаги устунини изламоқда. Витиньянинг техник маҳорат, юқори пас маданияти ва универсаллиги уни айнан шундай рол учун мос номзодга айлантиради.
Футбол таҳлилчилари таъкидлашича, агар бу трансфер амалга ошса, Витинья Лука Модричнинг вориси сифатида жамоада муҳим ўринни эгаллаши мумкин. Аммо ПСЖ уни осонликча қўйиб юборишга тайёр эмас — французлар янги мавсумда Европа майдонларида юқори натижа кўрсатишни режалаштирмоқда ва бу йўлда барча етакчи футболчиларини сақлаб қолишни истайди.
Шу сабаб “Реал” ҳозирча Витинья билан боғлиқ вазиятни кузатиш билан чекланмоқда. Агар парижликлар музокараларга розилик билдирса, трансфер ёзида бу битим жаҳон футболидаги энг катта келишувлардан бирига айланиши мумкин.
Мухлислар эса Витиньянинг келажаги атрофидаги интригани қизиқиш билан кузатмоқда. Чунки “Реал” ва “ПСЖ” ўртасидаги ҳар қандай битим — бу нафaқат клублар, балки бутун Европадаги футбол мувозанатини ўзгартирадиган воқеа бўлиши мумкин.