Россия АҚШ хавфсизлик стратегиясини маъқуллади: Европа эса хавотирда
Россия Доналд Трамп маъмурияти эълон қилган янги АҚШ Миллий хавфсизлик стратегиясини “асосан Москва қарашларига мос” деб баҳолади. Ҳужжатда Россия таҳдид сифатида кўрсатилмаган, Европа эса “цивилизацион хавф” остида экани айтилган. Стратегияда хорижий таъсирларга қарши курашиш, миграцияни назорат қилиш ва Европа Иттифоқидаги цензурага қарши туриш устувор вазифалар сифатида кўрсатилган.
Кремл сўзловчиси Дмитрий Песков ҳужжатни ижобий баҳолади, аммо якуний хулосага фақат уни батафсил таҳлил қилгачгина келишларини билдирди. Стратегия Россияга нисбатан юмшоқ тилда ёзилгани билан ажралиб туради, бу эса Европа расмийларини хавотирга солмоқда. Ҳужжатда АҚШнинг урушни тугатиш бўйича саъй-ҳаракатларига Европа тўсқинлик қилаётгани ва Россия билан барқарорликни тиклаш зарурияти таъкидланган.
Ҳужжат Европадаги “миллий руҳни тиклаш” ва сиёсий партияларни қўллаб-қувватлашни ҳам назарда тутади. Унда Европа келажакда таниб бўлмас ҳолга келиши ва иқтисодий муаммолари цивилизацион хавф олдида кичик аҳамиятга эга эканлиги айтилган. АҚШ Европадаги ҳамкорларини руҳий тикланишни қўллаб-қувватлашга чақирди.
Стратегияда “Америка биринчи” сиёсати таъкидланган. Ҳужжат Кариб денгизи ва Шарқий Тинч океанида гиёҳванд моддалар контрабандаси билан курашиш ва Венесуэлада эҳтимолий ҳарбий ҳаракатларни кўриб чиқишни назарда тутади. Шунингдек, Япония, Жанубий Корея, Австралия ва Тайвандаги мудофаа харажатларини ошириш талаб этилган. АҚШдаги демократлар стратегия халқаро алоқаларга салбий таъсир қилиши мумкинлигини билдирган.