Ширкатҳои сохтмонӣ QR код насб мекунанд, то муштариён фиреб нахӯранд
Дар шаҳри Душанбе дар назди ширкатҳои сохтмонӣ ё нуқтаҳои фурӯши биноҳои нави истиқоматӣ, QR кодҳои махсусро насб мекунанд, ки ин ба гуфтаи мақомот аз ҳолатҳои фиреб хӯрдани муштариён зимни хонахарӣ пешгирӣ мекардааст. Дар ин бора Раёсати корҳои дохилии шаҳри Душанбе рӯзи 24 декабр хабар дод.
Насби QR кодро дар назди сохтмони биноҳои нави истиқоматӣ, Сарраёсати меъморӣ ва шаҳрсозии Душанбе оғоз кардааст ва ба гуфтаи мақомот, бо ин роҳ харидор қабл аз харид ё бастани шартнома бо ширкати сохтмонӣ метавонад дар бораи сохтмон маълумоти заруриро пайдо кунад ва бисанҷад.
Яъне, бо скан кардани QR код ё рамзи насбшуда тавассути телефони худ, харидор имкон доранд бубинад, ки оё ширкат санади расмӣ, мисли қарори лоиҳакашӣ, шиносномаи бино, ё қарори иҷозаи сохтмонро дорад ё на.
Ба гуфтаи мақомот, ин иқдом бо дастури шаҳрдорӣ ва ба хотири пешгирӣ аз хатарҳо ҳангоми хонахарӣ роҳандозӣ шудааст.
Солҳои ахир бо зиёд шудани сохтмони биноҳои дар пойтахт, баҳсу шикоятҳо низ аз кори ширкатҳои хонасоз, ҳолатҳои фиреб хӯрдани муштариён ва ё фурӯхта шудани як хона ба чанд нафар бештар шудааст.