Ўзбекистонда уй-жой бозори жадаллашди: битимлар ва нархлар қанчага ўсди?

2025 йилнинг январь–сентябрь ойлари мобайнида Ўзбекистонда кўчмас мулк бозори сезиларли даражада фаоллашди. Расмий маълумотларга кўра, ушбу даврда мамлакат бўйлаб 229,8 мингта уй-жой олди-сотди шартномалари расман рўйхатдан ўтказилди. Бу ўтган йилнинг шу даврига нисбатан 12,8 фоизга кўп бўлиб, бозорда жиддий жонланиш кузатилаётганини кўрсатади.

Мутахассислар бу ўсишни бир нечта муҳим омиллар билан боғламоқда. Энг аввало, аҳоли томонидан ипотека кредитларига бўлган талаб ортди. Жорий йилнинг учинчи чорагида ипотека орқали ажратилган маблағлар ҳажми 5,6 триллион сўмга етди. Бу эса ўтган йилга нисбатан қарийб 15 фоизга яқин ўсиш демакдир. Шу билан бирга, аҳоли даромадларининг ошиб бориши ва хориждан келаётган пул ўтказмалари ҳажмининг кўпайиши ҳам бозорга қўшимча туртки берди.

Қурилиш соҳасида ҳам ижобий динамика сақланмоқда. Бир йил ичида мамлакатда қурилиш ишлари ҳажми 14,2 фоизга ўсди. Октябрь ойи бошига келиб, Ўзбекистонда жами 11,1 миллион квадрат метрдан ортиқ уй-жой қуриб битказилди. Бу кўрсаткич йиллик ҳисобда 2,4 фоиз ўсишни англатади.

Нархлар масаласига келсак, сентябрь ойида янги уй-жойлар қиймати ҳам ошди. Бирламчи бозорда квартиралар нархи сўмда ҳисоблаганда 2,4 фоизга, долларда эса 5,5 фоизга кўтарилди. Иккиламчи бозорда ҳам шунга яқин ҳолат кузатилиб, нархлар мос равишда 1,8 ва 5 фоизга ўсди.

Тошкент шаҳрида ижара бозори ҳам четда қолмади. Сентябрь ойида пойтахтда уй ижараси нархлари ўртача 5,4 фоизга ошди, йиллик ўсиш эса 8,4 фоизни ташкил этди. Шу билан бирга, ижара ҳақи билан иккиламчи уй-жой нархлари ўртасидаги фарқ тобора қисқариб бормоқда. Бу эса кўчмас мулк бозори аста-секин барқарор мувозанатга яқинлашаётганидан дарак беради.

Қисқаси, уй-жой бозори ҳозир «қизиб» турган паллада. Харидор ҳам, сотувчи ҳам ҳаракатда — бозор эса ўз қоидалари билан олдинга қараб кетяпти.