Mobiuz хусусийлаштирилиши: якуний учталикка қўшимча муддат берилди
“Universal Mobile Systems” МЧЖ (Mobiuz) устав капиталидаги 100 фоиз давлат улушини хусусийлаштириш жараёни ҳал қилувчи босқичга кирди. Давлат активларини бошқариш агентлиги маълумотига кўра, савдо жараёнида хорижий инвесторлардан 10 та мажбуриятсиз таклиф келиб тушган, 7 та талабгор эса якуний босқичга ўтказилган.
Энг муҳим жиҳати — белгиланган муддат, яъни 2025 йил 19 декабргача 6 та талабгор мажбуриятга эга (қатъий нарх) таклифларини тақдим этган. Шу таклифлар таҳлил қилиниб, сотиб олиш қиймати ва битимнинг бошқа асосий шартлари бўйича энг рақобатбардош деб топилган 3 та номзод ажратиб олинган. Энди айнан шу “якуний учталик”ка таклифларини янада яхшилаш учун 2026 йил 23 январ соат 23:59 гача қўшимча вақт берилди.
Эслатиб ўтамиз, Давактив 2025 йил август ойида Mobiuz хусусийлаштирилишига 15 та халқаро ва маҳаллий компания қизиқиш билдирганини маълум қилган эди. Шунингдек, Bloomberg июль ойида манбаларга таяниб, Ўзбекистон ҳукумати мазкур битимдан тахминан 300 млн доллар тушум кутaётганини ёзган — бу рақам кейинчалик маҳаллий ОАВда ҳам тилга олинган.
Энди интрига оддий: 23 январгача таклифлар “қай даражада қизийди” ва якунда қайси иштирокчи энг яхши нарх ва шартлар билан олдинга чиқади. Telekom бозорида рақобат кучайса, одатда, ютқазадиган томон битта — эски сифат. Қолгани эса фойда: инвестиция, тармоқ модернизацияси ва хизматлар яхшиланиши учун имкониятлар очилиши мумкин.