Ўзбекистон захиралари рекорд даражага чиқди: 66 млрд доллардан ошди
2026 йил 1 январ ҳолатига кўра, Ўзбекистоннинг олтин-валюта захиралари ҳажми 66,3 млрд долларга етди. Бу кўрсаткич декабрь ойи якунида бир ой ичида 5,1 млрд долларга ошган. Мазкур маълумотлар Марказий банк тақдим этган расмий ҳисоботда келтирилган.
Маълум қилинишича, ўтган ой давомида захираларнинг валюта қисми 829 млн долларга кўпайган. Шу билан бирга, олтин захираларининг қиймати 4,2 млрд долларга ўсиб, 55 млрд долларгача етган. Олтиннинг жисмоний ҳажми ҳам ортган бўлиб, у 12,2 млн троя унциядан 12,6 млн троя унциягача кўтарилган.
Умуман олганда, 2025 йил давомида мамлакатнинг захира активлари жами 25,1 млрд долларга ошган. Бундай кескин ўсиш, асосан, халқаро бозорда олтин нархининг сезиларли даражада қимматлашиши билан боғлиқ.
Жаҳон савдосидаги ноаниқликлар, АҚШ Федерал резерв тизимининг мустақиллиги юзасидан хавотирлар ҳамда Қўшма Штатларнинг фискал барқарорлигига доир шубҳалар кучайиши натижасида октябр ойида олтин нархи 4000 доллардан ошган. Декабрга келиб эса қимматбаҳо металл баҳоси 4500 доллардан ҳам юқори кўтарилган. Натижада, 2025 йил давомида олтин нархи 70 фоизга ўсиб, сўнгги 46 йил ичидаги энг юқори ўсиш кўрсаткичини қайд этган.
Бундан ташқари, Марказий банк томонидан харид қилинган қимматли қоғозлар қиймати ҳам сезиларли даражада ортган. Хусусан, ушбу кўрсаткич йил бошидаги 102 млн доллардан 1 млрд 532 млн долларгача ўсган.