Винисиус «Барселона» билан финалда клуб рекордини такрорлаши мумкин
Якшанба куни Мадриднинг «Реал» жамоаси Испания Суперкубоги финалида «Барселона»га қарши майдонга тушади. Ҳал қилувчи ўйинлардаги самарадорлиги билан танилган Винисиус Жуниор навбатдаги «эл класико»да финаллардаги голли ҳаракатлар бўйича клуб рекордини янгилаш имкониятига эга. Бу ҳақда euro-football.ru хабар беради.
Ҳозирча бу кўрсаткич бўйича «Реал» тарихида Криштиану Роналду, Карим Бензема ва Ференц Пушкаш етакчилик қилмоқда — уларнинг ҳар бирида финалларда 16 тадан гол+ассист бор. Винисиус эса улардан атиги бир очко орқада: бразилиялик футболчининг финал баҳсларидаги жами натижаси 15 та гол ва ассистдан иборат.
Шу билан бирга, Винисиус сўнгги пайтда гол уришда қийинчиликка дуч келмоқда: у «Реал» ва Бразилия терма жамоаси сафидаги охирги 19 учрашувда ҳисобни очмаган. «Атлетико»га қарши ярим финалда эса у ўйин охирида алмаштирилаётганда трибунадаги мухлислар томонидан ҳуштакбозлик билан кузатилди.