Қаршида тўртта йўналишга 43 та янги автобус чиқарилди
Қарши шаҳрига хусусий тадбиркорлар томонидан 3,3 млн доллар эвазига харид қилинган 43 та янги автобус олиб келинди. Битимни амалга ошириш учун бизнес вакиллари инвестициялар ҳамда банк кредитларини жалб қилган. Автопарк 37 та Yutong ва 6 та Asiastar русумли автобус билан тўлдирилди, дея маълум қилди Қарши ҳокимияти матбуот хизмати.
Транспорт вазирлиги маълумотига кўра, янги автобуслар шаҳар бош транспорт режасига мувофиқ тўртта йўналиш бўйича тақсимланди. Янги техника ишга туширилиши ортидан брутто-шартномалар тизимида ишлаётган йўналишлар сони 12 тага етди, улардаги автобуслар умумий сони эса 139 тани ташкил этди. Тармоқнинг ўтказувчанлиги кунига 150 минг нафаргача йўловчига хизмат кўрсатиш имконини беради.
Автобуслар кондиционер ва иситиш тизимлари, ногиронлиги бўлган шахслар учун мослаштирилган ускуналар, электрон тўлов тизими ҳамда овозли эълон модуллари билан жиҳозланган. Ҳокимиятда қайд этилишича, жорий йил давомида тадбиркорлар Хитойдан яна 100 та автобус харид қилишни режалаштирмоқда. Ушбу техника қўшимча тўққизта йўналишга чиқарилиб, улар ҳам брутто-шартномалар тизимига ўтказилади.
Шунингдек, 2026 йил охиригача Қарши жамоат транспорти парки Хитойда ишлаб чиқарилган яна 100 та автобус билан кенгайтирилиши ҳам режалаштирилган.