Шавкат Мирзиёев Чирчиқ авиация таъмирлаш заводи фаолияти билан танишди
Президент Шавкат Мирзиёев Чирчиқ авиация таъмирлаш заводига ташриф буюрди ва кенг кўламли модернизация натижалари ҳамда унинг янги юқори технологик бўлинмалари фаолияти билан танишди.
Завод негизида МДҲ ва минтақада ягона бўлган Airbus вертолётларига техник хизмат кўрсатиш маркази ишга туширилган. Марказ Франциянинг Airbus компанияси томонидан расмий сертификациядан ўтказилган бўлиб, ишлаб чиқариш юқори савияда ташкил этилгани, халқаро стандартлар ва ишлаб чиқарувчи томонидан белгиланган талабларга мувофиқлиги тасдиқланган. Бу ерда Ғарб авиатехникасининг замонавий моделлари, шу жумладан, H-125, H-215 ва H-130 русумли вертолётлар учун сервис ва таъмирлаш ишларининг тўлиқ занжири йўлга қўйилган.
Таъкидланишича, марказ Ўзбекистонни Airbus вертолётларига техник хизмат кўрсатиш ва уларни эксплуатация қилиш бўйича муҳим минтақавий хабга айлантириш имконини беради.
Президент марказ имкониятлари билан танишди ва мутахассислар билан мулоқот қилди. Мирзиёевга Су-25 ҳарбий самолётларини капитал таъмирлаш ва чуқур модернизация қилиш бўйича янгиланган цехлари тақдимот этилди. Илғор технологияларни жорий қилиш ҳисобига энди корхонада техникани замонавий навигация тизимлари, тунги кўриш қурилмалари ва бортдаги ўзини ҳимоя қилиш комплекслари билан жиҳозлаш ишлари амалга оширилмоқда.
Давлат раҳбари ташриф якунида мамлакат мудофаа саноати салоҳиятини янада мустаҳкамлаш бўйича топшириқлар берди.