«Челси» Мареска билан нега хайрлашгани ошкор бўлди...

Лондоннинг «Челси» клуби Энцо Мареска билан ҳамкорликни нима сабабдан тўхтатгани ҳақида янги маълумотлар тарқалди. Қайд этилишича, клуб раҳбарияти билан мураббий ўртасида асосий келишмовчилик футболчиларга қўйиладиган талаблар, айниқса жисмоний юклама масаласида юзага келган.

Манбаларга кўра, Мареска жамоа ичида жуда қаттиққўл тартиб ўрнатган. Унинг талабчанлиги баъзи футболчилар учун мотивация бўлган бўлиши мумкин, аммо айрим ҳолатларда бу ёндашув ортиқча хавф туғдирган. Энг кўп эътироз — эндигина жароҳатдан қайтган ўйинчилар билан ишлашда кўзга ташланган.

Гап шундаки, Энцо жароҳатдан тикланаётган футболчиларга ҳам умумий гуруҳ даражасидаги оғир юкламаларни берган. Тиббиёт ходимларининг тавсиялари ва эҳтиёт чораларига эса, айтилганидек, деярли аҳамият бермаган. Натижада баъзи футболчиларда жароҳат қайтадан қўзғалгани, тикланиш жараёни узайгани ҳақида ҳам гапирилмоқда.

Вазият жиддий тус олгач, «Челси» раҳбарлари мураббийлар штабига ҳатто жисмоний тайёргарлик бўйича қўшимча мутахассисни ишга олган. Лекин Мареска у мутахассис фикрларига ҳам қулоқ солмагани айтилади. Шу нуқтада клуб билан мураббийнинг йўллари бутунлай ажрала бошлаган: раҳбарият хавфсизлик ва узоқ муддатли манфаатни биринчи ўринга қўйган, Мареска эса максимал талаб ва қаттиқ режимдан қайтмаган.

Қисқаси, масала натижа ёки тактикада эмас — ички тартиб, юклама ва футболчининг саломатлигига муносабатда бўлган. «Челси» эса бу чизиқда “эксперимент” қилишни истамаган.